കോട്ടയം : വാറണ്ട് കേസില് ഒളിവില് കഴിഞ്ഞിരുന്ന പ്രതി പിടിയില്. ളാക്കാട്ടൂര് തോട്ടപ്പള്ളി ഭാഗത്ത് ഉണ്ണിക്കുട്ടനെ (ആരോമല്, 24) യാണു പാമ്പാടി പോലീസ് അറസ്റ്റ് ചെയ്തത്. വാകത്താനം, കോട്ടയം ഈസ്റ്റ്, കോട്ടയം വെസ്റ്റ്, പാമ്ബാടി എന്നീ സ്റ്റേഷനുകളിലായി നിരവധി കേസുകള് ഇയാള്ക്കെതിരേ നിലവിലുണ്ട്. പത്തനംതിട്ട ജില്ലയിലും ഇയാള്ക്കെതിരെ കേസുകളുണ്ടെന്ന് പോലീസ് പറഞ്ഞു.
മുമ്പ് കാപ്പാ നിയമപ്രകാരം ഇയാള്ക്കെതിരെ നടപടി സ്വീകരിച്ചിരുന്നു. കാലാവധി കഴിഞ്ഞെത്തിയ ഇയാള് സുഹൃത്തിനെ കുത്തിക്കൊലപ്പെടുത്താന് ശ്രമിച്ച കേസില് പ്രതിയായിരിക്കെ ജാമ്യം ലഭിച്ചു പുറത്തിറങ്ങിയതിനുശേഷം മറ്റൊരു വീട്ടില് അതിക്രമിച്ചു കയറി നാശനഷ്ടങ്ങള് വരുത്തിയതിനെ തുടര്ന്ന്, കോടതി ഇയാളുടെ ജാമ്യം റദ്ദാക്കുകയായിരുന്നു. അതിനുശേഷം പ്രതി ഒളിവില് പോകുകയായിരുന്നു.
പ്രതിക്കുവേണ്ടി കോട്ടയം ജില്ലാ പോലീസ് മേധാവിയുടെ നേതൃത്വത്തില് പ്രത്യേക അന്വേഷണസംഘം രൂപീകരിച്ച് തിരച്ചില് ശക്തമാക്കിയതിനെ തുടര്ന്ന്, പ്രതിയെ തിരുവനന്തപുരത്തു നിന്നും പിടികൂടുകയുമായിരുന്നു. പാമ്പാടി എസ്എച്ച്ഒ പ്രശാന്ത് കുമാര്, എസ്ഐ ലെബിമോന്, സിപിഒമാരായ ജിബിന് ലോബോ, ബിജേഷ്, അനീഷ് എന്നിവര് അന്വേഷണ സംഘത്തില് ഉണ്ടായിരുന്നു. പ്രതിയെ കോടതിയില് ഹാജരാക്കി.