പാലക്കാട്: മികച്ച ഗായികയ്ക്കുള്ള ദേശീയ പുരസ്കാരം നേടിയ നഞ്ചിയമ്മയെ അഭിനന്ദിച്ച്‌ നടന്‍ സുരേഷ് ഗോപി. ഗായികയെ വീട്ടില്‍ വന്ന് താമസിക്കാന്‍ അദ്ദേഹം ക്ഷണിച്ചു. സംവിധായകന്‍ സച്ചി വന്ന് തന്നോട് നേരിട്ട് സംസാരിക്കുന്നത് പോലെയാണ് തനിക്ക് തോന്നുന്നതെന്നും സിനിമയില്‍ നിന്ന് ആദ്യമായി വീഡിയോ കോള്‍ ചെയ്യുന്നത് സുരേഷ് ഗോപിയാണെന്നും നഞ്ചിയമ്മ ഇതിന് മറുപടിയായി പറഞ്ഞു. മൊബൈല്‍ റേഞ്ചില്‍ എന്തോ പ്രശ്നമുണ്ടെന്ന് പറഞ്ഞപ്പോള്‍, ബിഎസ്‌എന്‍എല്ലിനെ അറിയിച്ച്‌ പരിഹരിക്കാമെന്നും ഉറപ്പ് നല്‍കിയാണ് അദ്ദേഹം കോള്‍ അവസാനിപ്പിച്ചത്.
അയ്യപ്പനും കോശിയും എന്ന ചിത്രത്തിലെ ആലാപനത്തിനാണ് നഞ്ചിയമ്മയ്‌ക്ക് പുരസ്കാരം ലഭിച്ചത്. ഒരു നിഗൂഢത കൂടി ഉൾക്കൊണ്ടാണ് നഞ്ചിയമ്മ ‘കലക്കാത്ത സന്ദനം‘ എന്ന ഗാനം ആലപിച്ചത്. ചിത്രത്തിലെ ശോകഭാവത്തിലുള്ള ‘ദൈവമകളേ‘ എന്ന ഗാനവും ഏറെ ശ്രദ്ധിക്കപ്പെട്ടിരുന്നു. നാല് ഗാനങ്ങളാണ് അയ്യപ്പനും കോശിയും എന്ന ചിത്രത്തിൽ നഞ്ചിയമ്മ ആലപിച്ചിരിക്കുന്നത്.
