ഫുജൈറ : ഫുജൈറയില് ലക്ഷങ്ങളുടെ കാര്ഗോ തട്ടിപ്പ് നടത്തിയ മലയാളികള് മുങ്ങി. നാട്ടിലേക്കയക്കാന് പ്രവാസികള് നല്കിയ വിലപിടിപ്പിള്ള വസ്തുക്കളും ലക്ഷക്കണക്കിന് രൂപയുമായി ഉടമകള് നാട്ടിലേക്ക് മുങ്ങിയതായി പരാതി. ഫുജൈറ ദിബ്ബയില് പ്രവര്ത്തിച്ചിരുന്ന എ.എം.ടി കാര്ഗോ എന്ന സ്ഥാപനത്തിന്റെ ഉടമകളാണ് മുങ്ങിയത്. ഉടമകളായ കോഴിക്കോട് പയ്യോളി സ്വദേശി അര്ഷദ്, തൃശൂര് സ്വദേശി ബാബു എന്നിവര്ക്കെതിരെ ഉപഭോക്താക്കള് യു.എ.ഇയിലും കേരളത്തിലും പരാതി നല്കി.
ഇവര് നടത്തിയിരുന്ന സ്ഥാപനത്തില് നൂറുകണക്കിന് കാര്ഗോ ബോക്സുകളാണ് കെട്ടിക്കിടക്കുന്നത്. ഇതിലെ വിലപ്പെട്ട സാധനങ്ങള് എടുത്തശേഷമാണ് ഇവര് മുങ്ങിയതെന്ന് പരാതിക്കാര് പറയുന്നു. പ്രവാസികള് പ്രതീക്ഷയോടെ നാട്ടിലേക്ക് അയക്കാന് ഏല്പിച്ച നിരവധി സാധനങ്ങളാണ് ഇവിടെക്കിടന്ന് നശിക്കുന്നത്. ഇവര് മുങ്ങിയതോടെ സ്പോണ്സറായ യു.എ.ഇ പൗരന് ഈ സാധനങ്ങളെല്ലാം മറ്റൊരു ഫാമിലേക്ക് മാറ്റിയിട്ടുണ്ട്. ബില്ലുമായി എത്തുന്നവര്ക്ക് ഈ സാധനങ്ങള് തിരികെ നല്കാന് സ്പോണ്സര് ഒരാളെ ചുമതലപ്പെടുത്തിയിട്ടുണ്ട്. ഈ സ്ഥാപനം വഴി കാര്ഗോ അയച്ചവര് ബില്ലുമായി ഇവിടെ നേരിട്ട് എത്തിയാല് ഇവിടെയുള്ള സാധനങ്ങള് തിരികെ നല്കുന്നുണ്ട്.
കാര്ഗോ തുകയായി ഉപഭോക്താക്കള് അയച്ച ലക്ഷക്കണക്കിന് രൂപയുമായാണ് ഇവര് മുങ്ങിയിരിക്കുന്നത്. ഉപഭോക്താക്കള്ക്കുപുറമെ കാര്ഗോയുമായി ബന്ധപ്പെട്ട മറ്റ് ഇടപാടുകാര്ക്കും ഇവര് പണം നല്കാനുണ്ട്. ഇവരുടെ ഫോണ് സ്വിച്ച് ഓഫ്ചെയ്ത നിലയിലാണ്. 2019 വരെ സജീവമായിരുന്ന ഈ കമ്പനിയുടെ സമൂഹമാധ്യമ പേജുകള് നിലവില് നിര്ജീവമായ നിലയിലാണ്. മലയാളികള്ക്കുപുറമെ ഇന്ത്യയിലെ മറ്റു സംസ്ഥാനങ്ങളില്നിന്നുള്ള നിരവധി പേരും ഇവരുടെ തട്ടിപ്പിന് ഇരയായി. ഇവര് യു.എ.ഇ ആഭ്യന്തരമന്ത്രാലയത്തില് പരാതി നല്കിയിട്ടുണ്ട്. മലയാളികള് കേരള മുഖ്യമന്ത്രി പിണറായി വിജയനും ഡി.ജി.പിക്കും പരാതി നല്കിയിട്ടുണ്ട്.