മല്ലപ്പള്ളി : കെ.എസ്.ആർ.ടി.സി മല്ലപ്പള്ളി സബ് ഡിപ്പോയിൽ ബസുകൾ ട്രിപ്പുകൾ മുടക്കുന്നതുമൂലം യാത്രക്കാർ പെരുവഴിയിലാകുന്നു. ഡീസൽ ക്ഷാമം കാരണം കളക്ഷൻ കുറവുള്ള ബസുകൾ ട്രിപ്പുകൾ മുടക്കുകയും പാതി വഴിയിൽ സർവീസ് അവസാനിപ്പിക്കുകയുമാണ്. കിലോമീറ്ററിന് 35 രൂപയിൽ കുറവ് കളക്ഷൻ ലഭിക്കാത്ത എല്ലാ ബസുകളും സർവീസ് തുടരേണ്ടെന്നാണ് ജീവനക്കാർക്ക് കൊടുത്തിരിക്കുന്ന നിർദ്ദേശം. ഇത്തരത്തിൽ ഏഴ് ബസുകളാണ് തിങ്കളാഴ്ച ട്രിപ്പ് മുടക്കി തിരിച്ചെത്തിയത്. ഈ തീരുമാനം മൂലം ദുരിതത്തിലായത് 100 കണക്കിന് യാത്രക്കാരാണ്.
കെ.എസ്.ആർ.ടി.സിൽ പാസ് എടുത്തിട്ടുള്ള വിദ്യാർഥികളും മറ്റും യാത്രാസൗകര്യമില്ലാതെ പരക്കം പായുന്ന സ്ഥിതിയായിരുന്നു. ഇത് സ്വകാര്യ ബസ് ലോബി മുതലെടുക്കുന്നതായും പരാതി ഉയർന്നിട്ടുണ്ട്. കെ.എസ്.ആർ.ടി.സിയെ മാത്രം ആശ്രയിക്കുന്ന മല്ലപ്പള്ളി -കല്ലൂപ്പാറ റൂട്ടിലും ബസ് സർവീസ് മുടക്കുന്നത് യാത്രക്കാരെ വലക്കുകയാണ്.