ചെങ്ങന്നൂർ : സ്വാതന്ത്ര്യത്തിൻ്റെ 75-ാം വാർഷികത്തോടനുബന്ധിച്ച് അഖില ഭാരതീയ പൂർവ്വ സൈനിക് സേവാ പരിഷത്ത്, സൈന്യ മാതൃ ശക്തി തിരുവൻവണ്ടൂർ യൂണിറ്റിന്റെ നേതൃത്വത്തിൽ സ്വാതന്ത്ര്യ ദിനം ആഘോഷിച്ചു. ഇതിനോടനുബന്ധിച്ച് തിരംഗ് യാത്ര നടത്തി. റിട്ടയേർഡ് സുബേദാർ മേജർ വാസുദേവൻ പതാക കൈമാറി.
കണ്ടത്തിൽ പടിയിൽ നിന്നും ആരംഭിച്ച തിരംഗ് യാത്ര തിരുവൻവണ്ടൂർ ജംഗ്ഷനിൽ സമാപിച്ചു. കേണൽ രാധാകൃഷ്ണൻ നായർ (കമാണ്ടൻ്റ്, അവാർഡഡ് പ്രസിഡണ്ട് ,പോലീസ് മെഡൽ, ഡി.ജി കമ്ണ്ടേഷൻ, ഡി.ജി ഹോണറിയം) ദേശീയ പതാക ഉയർത്തി. തുടർന്ന് സ്വാതന്ത്രദിന സന്ദേശം നൽകി.
ക്ഷേത്ര ജംഗ്ഷനിൽ ചേർന്ന യോഗത്തിൽ തിരുവൻവണ്ടൂർ പഞ്ചായത്തിൽ വിവിധ തൊഴിൽ മേഖലയിൽ പ്രാവീണ്യം തെളിയിച്ച 10 പേരെ ആദരിച്ചു. തിരംഗാ യാത്രയെ സെൻറ് ജോർജ് ഓർത്തഡോക്സ് ചർച്ച് ,1152-ാം നമ്പർ എസ്എൻഡിപി ശാഖാ യോഗം, ടാഗോർ മെമ്മോറിയൽ യൂത്ത് ക്ലബ് ഭാരവാഹികൾ സ്വീകരിച്ചു. 200 ഓളം പേർ ചടങ്ങിൽ പങ്കെടുത്തു. തുടർന്ന് മധുരവിതരണവും നടത്തി.