മക്ക: നാഡി ട്യൂമര്‍ ബാധിച്ചു ചികിത്സയിലായിരുന്ന കാസര്‍കോട് സ്വദേശിയായ വിദ്യാര്‍ഥി മക്കയില്‍ മരിച്ചു. തളങ്കര സ്വദേശി അബ്ദുല്‍ മജീദിന്റെ മകന്‍ ഹസ്സാം (18) ആണ് മരിച്ചത്. പുലര്‍ച്ചെ അസുഖം മൂര്‍ച്ഛിച്ചതിനെ തുടര്‍ന്ന് മക്കയിലെ സാഹിര്‍ കിങ് അബ്ദുല്‍ അസീസ് ആശുപത്രി തീവ്രപരിചരണ വിഭാഗത്തില്‍ പ്രവേശിപ്പിച്ചെങ്കിലും മരിക്കുകയായിരുന്നു. തളങ്കര ഗവണ്‍മെന്‍റ് മുസ്ലിം വൊക്കേഷണല്‍ ഹയര്‍ സെക്കന്‍ഡറി സ്കൂള്‍ ഒമ്പതാം ക്ലാസ് വിദ്യാര്‍ഥിയായിരുന്നു.
15 വര്‍ഷമായി കുടുംബസമേതം മക്കയില്‍ താമസിച്ചിരുന്ന ഇവര്‍ രണ്ടു വര്‍ഷം മുമ്പ് നാട്ടിലേക്ക് മടങ്ങിയതായിരുന്നു. ആറ് മാസം മുമ്പ് വീണ്ടും കുടുംബം സന്ദര്‍ശക വിസയില്‍ മക്കയിലെത്തിയതായിരുന്നു. മാതാവ്: സിയാന. സഹോദരങ്ങള്‍: സയാന്‍, മാസിന്‍, ആയിഷ. നടപടികള്‍ പൂര്‍ത്തിയാക്കി മയ്യിത്ത് മക്കയില്‍ ഖബറടക്കുമെന്ന് ബന്ധുക്കള്‍ അറിയിച്ചു.
