ഡല്ഹി: നിലമ്പൂര് രാധ വധക്കേസിലെ പ്രതികളെ വെറുതെ വിട്ട ഹൈക്കോടതി വിധിക്കെതിരെ സംസ്ഥാന സര്ക്കാര് സുപ്രീം കോടതിയില്. കേസിലെ പ്രതികളായിരുന്ന ബി കെ ബിജു, ഷംസുദ്ദീന് എന്നിവരെ വെറുതെ വിട്ട നടപടിക്കെതിരെയാണ് അപ്പീല്. പ്രോസിക്യൂഷന് ഹാജരാക്കിയ വസ്തുക്കളെയും സാഹചര്യ തെളിവുകളെയും ഹൈക്കോടതി ശരിയായ രീതിയില് വിലയിരുത്തിയില്ലെന്ന് സംസ്ഥാനം സമര്പ്പിച്ച ഹര്ജിയില് പറയുന്നത്.
രണ്ടാം പ്രതിയുടെ വീട്ടില് നിന്ന് രാധയുടെ ആഭരണങ്ങള് കണ്ടെത്തിയതടക്കം കാര്യങ്ങള് ഹൈക്കോടതി കണക്കിലെടുത്തില്ല. ഒന്നാം പ്രതി ബിജുവിന്റെ വഴിവിട്ട ബന്ധങ്ങള് പുറത്ത് വരാതിരിക്കാനാണ് രാധയെ കൊലപ്പെടുത്തിയതെന്ന് തെളിയിക്കാന് വ്യക്തമായ തെളിവുകളുണ്ടെന്നും അപ്പീലില് പറയുന്നു. സംസ്ഥാന സര്ക്കാരിനായി സ്റ്റാന്റിംഗ് കോണ്സല് നിഷേ രാജന് ഷൊങ്കറാണ് സുപ്രീം കോടതിയില് അപ്പീല് ഫയല് ചെയ്തിരിക്കുന്നത്.
ദൃക്ഷസാക്ഷികളില്ലാത്ത കേസില് പോലീസ് ശേഖരിച്ച ശാസ്ത്രീയ തെളിവുകള് നിലനില്ക്കുന്നതല്ലെന്ന് കണ്ടെത്തിയാണ് ഹൈക്കോടതി പ്രതികളുടെ ശിക്ഷ റദ്ദാക്കിയത്. 2014 ഫെബ്രുവരി അഞ്ചിന് കാണാതായ രാധയുടെ മൃതദേഹം അഞ്ച് ദിവസത്തിനുശേഷം ചുള്ളിയോട് ഒരു കുളത്തിലാണ് കണ്ടെത്തിയത്. പിന്നാലെതന്നെ ബിജു നായരേയും സുഹൃത്ത് ഷംസുദ്ദീനേയും പോലീസ് അറസ്റ്റു ചെയ്തു. രഹസ്യ ബന്ധങ്ങള് പുറത്തുപറയുമെന്ന രാധയുടെ ഭീഷണിയില് ഭയന്ന ബിജു സുഹൃത്ത് ഷംസുദ്ദീന്റ്ര് സഹായത്തോടെ രാധയെ കൊലപ്പെടുത്തി കുളത്തില് തള്ളിയെന്നായിരുന്നു പോലീസ് കേസ്.