തിരുവനന്തപുരം; തിരുവനന്തപുരത്ത് മാരകായുധങ്ങളുമായി ഗുണ്ടാ സംഘം പിടിയില്. തിരുവനന്തപുരം കഠിനംകുളത്താണ് തോക്കും മാരകായുധങ്ങളുമായി ഗുണ്ടാ സംഘം പിടിയിലായത്. ഒരാള് ഓടി രക്ഷപ്പെട്ടു. കഠിനംകുളം ചാന്നാങ്കര പാലത്തിനു സമീപം ഇന്നലെ രാത്രി പത്തുമണിയോടെയാണ് സംഭവം. നിരവധി ക്രിമിനല് കേസുകളിലെ പ്രതികളാണ് പിടിയിലാവര്. വര്ക്കല സ്വദേശി ഷാഹുല് ഹമീദ്,കണിയാപുരം സ്വദേശി മനാല് എന്നിവരെയാണ് പോലീസ് കസ്റ്റഡിയില് എടുത്തത്. പ്രതി മനാലിന്റെ വീട്ടില് നിന്നും രണ്ടു തോക്കുകള് കൂടി പോലീസ് പിടിച്ചെടുത്തു.
കൊലപാതക ക്വട്ടേഷനായി എത്തിയതിനിടെയാണ് ഇവര് പോലീസിന്റെ വലയിലാകുന്നത്. ഇന്ന് വിദേശത്തേക്ക് പോകാനിരുന്ന ഒരാളെ കൊലപ്പെടുത്താന് എത്തിയതായിരുന്നു സംഘം. ഇതിനിടെ ബൈക്കിലെത്തിയ സംഘം റോഡില് നില്ക്കുകയായിരുന്ന യുവാക്കളുമായി തര്ക്കമുണ്ടായി. തുടര്ന്ന് ഒരാള് കത്തിയുമായി യുവാക്കളെ ആക്രമിക്കാന് ഇറങ്ങി. കത്തിവീശി ആക്രോശിച്ച് നാട്ടുകാരെ ആക്രമിക്കാന് ശ്രമിച്ചു. പിന്നീട് നാട്ടുകാര് ഇവരെ കീഴ്പ്പെടുത്തി പോലീസില് ഏല്പ്പിക്കുകയായിരുന്നു. ചാന്നാങ്കര സ്വദേശി ഫവാസാണ് ഇതിനിടെ ബൈക്കുമായി രക്ഷപ്പെട്ടത്.