ന്യൂഡല്‍ഹി: രാഹുല്‍ ഗാന്ധിക്കെതിരെ പ്രതികാര നടപടിയെന്ന് കോണ്‍ഗ്രസ്. പാര്‍ലമെന്റിലെ രാഹുലിന്റെ ആരോപണങ്ങളോടുള്ള പ്രതികാരമാണ് ഡല്‍ഹി പോലീസിന്റെ നടപടിയെന്നാണ് ആരോപിക്കുന്നത്. ഭയപ്പെടുത്താനുള്ള രാഷ്ട്രീയ നീക്കമാണിതെന്നും കോണ്‍ഗ്രസ് ആരോപിക്കുന്നു. 10 ദിവസത്തിനുള്ളില്‍ മറുപടി നല്‍കാം എന്ന് രാഹുല്‍ ഗാന്ധി അറിയിച്ചതാണ്. ഇതിനിടയില്‍ വീണ്ടും പോലീസ് വന്നത് വിവാദം സൃഷ്ട്ടിക്കാനാണെന്നും മനു അഭിഷേഖ് സിങ് വി പറഞ്ഞു. കഴിഞ്ഞ രണ്ടുദിവസത്തിനിടെ മൂന്ന് തവണയാണ് പോലീസ് രാഹുല്‍ ഗാന്ധിയെ തേടിയെത്തിയത്.
ഭാരത് ജോഡോ യാത്രയുടെ സമാപന സമ്മേളന വേദിയില്‍ രാഹുല്‍ ഗാന്ധി നടത്തിയ പ്രസംഗത്തിലായിരുന്നു പരാമര്‍ശം. രാഹുല്‍ ഗാന്ധിക്ക് എതിരെയുള്ള പോലീസ് നടപടിയില്‍ പ്രവര്‍ത്തകരും നേതാക്കളും പ്രതിഷേധം രേഖപ്പെടുത്തി. ഭാരത് ജോഡോ യാത്രയ്ക്കിടെ താന്‍ നിരവധി സ്ത്രീകളെ കണ്ടെന്നും, അവര്‍ ബലാത്സംഗത്തിന് ഇരകളായെന്ന് വെളിപ്പെടുത്തിയെന്നും ജനുവരി 30ന് ശ്രീനഗറില്‍വച്ച് രാഹുല്‍ ഗാന്ധി പറഞ്ഞിരുന്നു. ഇതുമായി ബന്ധപ്പെട്ട് അദ്ദേഹത്തില്‍നിന്നും വിവരങ്ങള്‍ ചോദിച്ചറിഞ്ഞ് ഇരകള്‍ക്ക് നീതി ഉറപ്പാക്കാനാണ് എത്തിയതെന്നാണ് സ്‌പെഷല്‍ പോലീസ് കമ്മിഷണര്‍ സാഗര്‍ പ്രീത് ഹൂഡ അറിയിച്ചത്.
