ശിവമോഗ: സ്ത്രീകളുടെ പാര്‍ട്ടി തടഞ്ഞ് ബജ്റംഗ്ദള്. കര്‍ണാടകയിലെ ശിവമോഗയിലാണ് സംഭവം. സ്ത്രീകളുടെ പാര്‍ട്ടി സംസ്‌കാരത്തിന് എതിരാണെന്നാണ് ബജ്റംഗ്ദള് പ്രവര്‍ത്തകര്‍ ആരോപിക്കുന്നത്. പാര്‍ട്ടി നടത്താന്‍ അനുവദിക്കില്ലെന്ന ഭീഷണിയുമായി ഒരു കൂട്ടം ബജ്റംഗ്ദള് പ്രവര്‍ത്തകര്‍ ഹോട്ടലില്‍ എത്തുകയായിരുന്നു. ക്ലിഫ് എംബസി എന്ന ഹോട്ടലില്‍ രാത്രിയാണ് സംഭവം. അതേസമയം അനിഷ്ട സംഭവങ്ങള്‍ ഉണ്ടാകാതിരിക്കാന്‍ പോലീസ് സ്ഥലത്തെത്തി.
സ്ത്രീകളോട് ഹോട്ടലില്‍ നിന്ന് പുറത്തുപോകാന്‍ ആവശ്യപ്പെടുകയും ചെയ്തു. സ്ത്രീകളും അവരുടെ ബന്ധുക്കളും ഉള്‍പ്പെടെ എഴുപതോളം പേരാണ് പാര്‍ട്ടിയില്‍ പങ്കെടുക്കാന്‍ എത്തിയത്. പിന്നാലെ ബജ്റംഗ്ദള് ജില്ലാ കണ്‍വീനര്‍ രാജേഷ് ഗൗഡയുടെ നേതൃത്വത്തില്‍ പ്രവര്‍ത്തകര്‍ ഹോട്ടലിലെത്തി പാര്‍ട്ടി നടത്താന്‍ സമ്മതിക്കില്ലെന്ന് പറഞ്ഞു. പ്രവര്‍ത്തകര്‍ പാര്‍ട്ടിയെ എതിര്‍ത്തതിനെ തുടര്‍ന്ന് ഹോട്ടലിനുള്ളില്‍ സ്ത്രീകളും പുരുഷന്മാരും ഏതാനും കുട്ടികളും ഉള്‍പ്പെടെയുള്ളവര്‍ പുറത്തിറങ്ങി. സ്ത്രീകളുടെ നിശാപാര്‍ട്ടി നടക്കുമെന്ന് ഞങ്ങള്‍ ഒരാഴ്ച മുമ്പ് പോലീസിനെ അറിയിച്ചിരുന്നുവെന്ന് ബജ്റംഗ്ദള് നേതാവ് രാജേഷ് ഗൗഡ പറഞ്ഞു. മലനാട് മേഖലയില്‍ ഇത്തരം പാര്‍ട്ടികള്‍ സംഘടിപ്പിക്കരുത്. ഞങ്ങള്‍ പോലീസുമായി പോയി പാര്‍ട്ടി നിര്‍ത്തിയെന്നും പാര്‍ട്ടിയിലെ സ്ത്രീകളുടെ വസ്ത്രധാരണത്തോടുള്ള എതിര്‍പ്പും അദ്ദഹം പ്രകടിപ്പിച്ചു.
