കണ്ണൂര്: കണ്ണൂര് തളിപ്പറമ്പ് പോലീസ് സ്വപ്ന സുരേഷിനും വിജേഷ് പിള്ളക്കുമെതിരെ എടുത്ത ഗൂഢാലോചന കേസ് ക്രൈം ബ്രാഞ്ചിന് കൈമാറും. സിപിഎം തളിപ്പറമ്പ് ഏരിയ സെക്രട്ടറി കെ സന്തോഷിന്റെ പരാതിയിലായിരുന്നു ഇരുവര്ക്കുമേതിരെ ജാമ്യമില്ല വകുപ്പുകള് പ്രകാരം കേസെടുത്തത്. ഗൂഢാലോചന, വ്യാജ രേഖ ചമക്കല്, കലാപശ്രമം തുടങ്ങിയ വകുപ്പുകളാണ് ഇരുവര്ക്കുമെതിരെ ചുമത്തിയത്. മുഖ്യമന്ത്രിക്കും എം വി ഗോവിന്ദനും എതിരായ അപവാദ പ്രചരണങ്ങളില് നടപടി ആവശ്യപ്പെട്ടാണ് പരാതി. തളിപ്പറമ്പ് എസ്എച്ച്ഒയ്ക്കാണ് പരാതി നല്കിയത്.
സ്വപ്ന സുരേഷും വിജേഷ് പിള്ളയും ഗൂഢാലോചന നടത്തിയാണ് വീഡിയോ തയ്യാറാക്കിയതെന്ന് പരാതിയില് ആരോപിക്കുന്നു. വീഡിയോയിലെ സംഭാഷണം പുറത്ത് വിടാതിരിക്കുന്നത് ദുരൂഹമാണ്. സിപിഎം സംസ്ഥാന സെക്രട്ടറിയെയും മുഖ്യമന്ത്രിയെയും അപകീര്ത്തിപ്പെടുത്താന് ഗൂഢാലോചന നടന്നുവെന്നും വ്യാജ രേഖ ചമ്മച്ചെന്നും പരാതിക്കാരന് ആരോപിക്കുന്നു. അതേസമയം സ്വപ്നക്ക് എതിരെ വിജേഷ് പിള്ള നല്കിയ പരാതി നിലവില് ക്രൈം ബ്രാഞ്ച് കണ്ണൂര് യൂണിറ്റ് അന്വേഷണം തുടങ്ങിയിട്ടുണ്ട്. ഈ സാഹചര്യത്തിലാണ് സമാന സ്വഭാവമുള്ള കേസ് എന്ന നിലയില് സിപിഎം നല്കിയ പരാതിയും ക്രൈം ബ്രാഞ്ചിന് കൈമാറാന് തീരുമാനിച്ചത്.