ദില്ലി: അപകീര്‍ത്തി കേസില്‍ രാഹുല്‍ ഗാന്ധി നേരിട്ട് ഹാജരാകണമെന്ന് റാഞ്ചി കോടതി. മോദി പരാമര്‍ശത്തിലെ അപകീര്‍ത്തി കേസില്‍ ഇളവ് തേടി രാഹുല്‍ നല്‍കിയ ഹര്‍ജി റാഞ്ചി കോടതി തള്ളി. മോദി പരാമര്‍ശത്തില്‍ രാഹുലിനെതിരെ റാഞ്ചിയിലും ഒരാള്‍ പരാതി നല്‍കിയിരുന്നു. പ്രദീപ് മോദിയെന്നയാളാണ് കോലാര്‍ പ്രസംഗത്തിനെതിരെ കോടതിയെ സമീപിച്ചത്. ഇതേ കേസില്‍ രാഹുല്‍ ഗാന്ധിയെ സൂറത്ത് കോടതി കുറ്റക്കാരനാക്കി രണ്ട് വര്‍ഷം തടവിന് ശിക്ഷിച്ച് ആഴ്ചകള്‍ക്ക് ശേഷമാണ് ഇത്. ശിക്ഷിക്കപ്പെട്ടതിനെ തുടര്‍ന്ന് രാഹുല്‍ ഗാന്ധിയെ പാര്‍ലമെന്റില്‍ നിന്ന് അയോഗ്യനാക്കിയിരുന്നു.
2019ല്‍ കര്‍ണാടകയിലെ കോലാറില്‍ നടന്ന പൊതുറാലിക്കിടെ രാഹുല്‍ ഗാന്ധി ‘മോദി’ എന്ന കുടുംബപ്പേര് പരാമര്‍ശിച്ചതിനെ തുടര്‍ന്ന് അഭിഭാഷകനായ പ്രദീപ് മോദി റാഞ്ചിയില്‍ പരാതി നല്‍കിയിരുന്നു. 2019ലെ ലോക്സഭാ തെരഞ്ഞെടുപ്പിന്റെ പ്രചാരണത്തിനിടെ ‘നീരവ് മോദി, ലളിത് മോദി, നരേന്ദ്ര മോദി… എല്ലാവര്‍ക്കും എങ്ങനെയാണ് മോദി എന്ന പൊതുനാമം ഉണ്ടായത്? എല്ലാ കള്ളന്മാര്‍ക്കും എങ്ങനെയാണ് മോദി എന്ന പൊതുനാമം ഉണ്ടായത്? എന്നായിരുന്നു രാഹുല്‍ ഗാന്ധി പറഞ്ഞത്.
