തിരുവനന്തപുരം: ഡി വൈ എഫ് ഐയുടെ പൊതിച്ചോര്‍ പദ്ധതിയടക്കമുള്ള പരിപാടികള്‍ മാതൃകയാക്കേണ്ടതാണെന്ന കോണ്‍ഗ്രസ് നേതാവ് രമേശ് ചെന്നിത്തലയുടെ പരാമര്‍ശത്തിന് മറുപടിയുമായി യൂത്ത് കോണ്‍ഗ്രസ് സംസ്ഥാന പ്രസിഡന്റ് ഷാഫി. യൂത്ത് കെയറിന്റെ പ്രവര്‍ത്തനങ്ങളും സഹ പ്രവര്‍ത്തകര്‍ ഏറ്റുവാങ്ങിയ മര്‍ദ്ദനങ്ങളും ഷാഫി പറമ്പില്‍ ഓര്‍മിപ്പിച്ചു. ഒരു സര്‍ക്കാര്‍ സംവിധാനങ്ങളുടെയും സഹായമില്ലാതെ സ്വന്തം അധ്വാനത്തിന്റെ കുഞ്ഞു വിഹിതങ്ങള്‍ കൊണ്ടും സുമനസ്‌ക്കരുടെ സഹായം കൊണ്ടും പ്രതിസന്ധികളുടെ കാലത്ത് യുവതയുടെ കരുതലായി യൂത്ത് കെയര്‍.
ഇതിന്റെ പ്രവര്‍ത്തനങ്ങള്‍ക്ക് നേതൃത്വം നല്‍കുകയും, ജനവിരുദ്ധ തീരുമാനങ്ങള്‍ക്കെതിരെ സമര സജ്ജരായി നിരവധി കേസുകളില്‍ പ്രതി ചേര്‍ക്കപ്പെടുകയും ക്രൂര മര്‍ദനങ്ങള്‍ക്ക് ഇരയാകേണ്ടി വരികയുമൊക്കെ ചെയ്ത സഹപ്രവര്‍ത്തകരെ പ്രസ്ഥാനം മറക്കുകയില്ല. അഭിമാനമാണ് നിങ്ങളും യൂത്ത് കെയറും. ഷാഫി പറമ്പില്‍ ഫെയ്സ്ബുക്ക് കുറിപ്പില്‍ പറഞ്ഞു. യൂത്ത് കെയര്‍ ജില്ലാ സമ്മേളനത്തിനിടയിലെ രമേശ് ചെന്നിത്തലയുടെ വാക്കുകള്‍ ചര്‍ച്ചയായതിന് പിന്നാലെയാണ് ഷാഫി, യൂത്ത് കെയറിന്റെ പ്രവര്‍ത്തനങ്ങള്‍ ഓര്‍മ്മിപ്പിച്ച് രംഗത്തെത്തിയത്.
