ചെന്നൈ: ‘ദ കേരള സ്റ്റോറി’ സിനിമ തമിഴ്നാട്ടില് നിരോധിക്കണമെന്ന് എസ്ഡിപിഐ സര്ക്കാറിനോട് ആവശ്യപ്പെട്ടു. തമിഴകത്തിന്റെ സമാധാന അന്തരീക്ഷം തകര്ക്കുന്നതാണ് സിനിമയെന്നും ചിത്രം റിലീസ് ചെയ്താല് പ്രതിഷേധം സംഘടിപ്പിക്കുമെന്ന് എസ്ഡിപിഐ സംസ്ഥാന പ്രസിഡന്റ് നെല്ലൈ മുബാറക് മാധ്യമങ്ങളോട് പറഞ്ഞു. വര്ഗീയ വിദ്വേഷവും മത സംഘര്ഷവും ഉണ്ടാക്കാനും സമാധാനാന്തരീക്ഷം തകര്ക്കാനുമാണ് ശ്രമിക്കുന്നത്. ന്യൂനപക്ഷ മുസ്ലീം സമുദായം നേരിടുന്ന പ്രശ്നങ്ങളെക്കുറിച്ച് സംസാരിക്കാതെ അപവാദം പ്രചരിപ്പിക്കുകയും സമാധാനം തകര്ക്കുകയും ചെയ്യുന്ന ഇത്തരം വ്യാജ രാഷ്ട്രീയ പ്രേരിത പ്രചരണ സിനിമകള് നിരോധിക്കണമെന്നും മുബാറക് ആവശ്യപ്പെട്ടു.
അതേസമയം ‘കേരളാ സ്റ്റോറി’ വെള്ളിയാഴ്ച റിലീസ് ചെയ്യാനിരിക്കുന്ന സാഹചര്യത്തില് സംസ്ഥാനത്തെ ക്രമസമാധാന നില നിരീക്ഷിക്കാനും അത് നിലനിര്ത്താനും തമിഴ്നാട് സര്ക്കാര് എല്ലാ കലക്ടര്മാര്ക്കും പോലീസ് സൂപ്രണ്ടുമാര്ക്കും ജാഗ്രതാ നിര്ദേശം നല്കി. ഹിന്ദി, മലയാളം, തമിഴ്, തെലുങ്ക് എന്നീ നാല് ഭാഷകളില് ചിത്രം റിലീസ് ചെയ്യുന്നത്.