ബെംഗളൂരു: കര്‍ണാടകയിലെ നിയമസഭാ തിരഞ്ഞെടുപ്പിനോടനുബന്ധിച്ച് മെയ് 9,10 തീയതികളില്‍ ബെംഗളൂരു ബസ് സര്‍വീസുകള്‍ തടസ്സപ്പെടുമെന്നാണ് റിപ്പോര്‍ട്ട്. ജില്ലാ ഭരണകൂടത്തിനും പോലീസ് വകുപ്പിനും തിരഞ്ഞെടുപ്പ് ഡ്യൂട്ടിക്കായി കെഎസ്ആര്‍ടിസി ഗണ്യമായ എണ്ണം ബസുകള്‍ വിന്യസിച്ചിട്ടുണ്ടെന്നും അതിനാല്‍ മേയ് 9, 10 തീയതികളില്‍ കെഎസ്ആര്‍ടിസി ബസുകളുടെ പ്രവര്‍ത്തനം തടസ്സപ്പെടുമെന്നും ചീഫ് ട്രാഫിക് മാനേജര്‍ വാര്‍ത്താക്കുറിപ്പില്‍ അറിയിച്ചു. അതേസമയം വോള്‍വോയും മറ്റ് പ്രീമിയം ബസ് സര്‍വീസുകളും നഗരത്തില്‍ പതിവുപോലെ പ്രവര്‍ത്തിക്കും.
തിരഞ്ഞെടുപ്പ് കാരണം ഡ്രൈ ഡേകളില്‍ മദ്യം വിളമ്പാന്‍ കഴിയാത്തതിനാല്‍ ചില റെസ്റ്റോറന്റുകളും പ്രവര്‍ത്തിക്കില്ല. മെയ് എട്ടിന് വൈകിട്ട് അഞ്ച് മുതല്‍ മെയ് 11ന് രാവിലെ ആറ് വരെയും മെയ് 13ന് രാവിലെ ആറ് മുതല്‍ മെയ് 14ന് രാവിലെ ആറ് വരെയും മദ്യവില്‍പന നിരോധിക്കുമെന്ന് തെരഞ്ഞെടുപ്പ് കമ്മീഷന്‍ ഉത്തരവില്‍ വ്യക്തമാക്കിയിരുന്നു.
