തിരുവനന്തപുരം: നെയ്യാറ്റിന്കര ജനറല് ആശുപത്രിക്കെതിരെ നിരവധി പരാതികള് ഉയര്ന്നതോടെ ആരോഗ്യവിഭാഗം വിജിലന്സ് സംഘം പരിശോധന നടത്തി. ആശുപത്രിയില് ആവശ്യത്തിന് ഡോക്ടര്മാരില്ലാത്തതിലും ചികിത്സ പിഴവിനെതിരെയും വ്യാപക പ്രതിഷേധമുയരുന്ന സാഹചര്യത്തിലാണ് പരിശോധന നടന്നത്. ഒരു വര്ഷത്തിനിടെ നിരവധി പിഴവുകളാണ് ആശുപത്രിയില് സംഭവിച്ചത് എന്ന് രോഗികള് പറയുന്നു. ഡോക്ടര്മാരുടെ അഭാവം മൂലം, അവര് നേരിട്ട് ചെയ്യേണ്ട പല കാര്യങ്ങളും നഴ്സുമാര് ചെയ്യുന്നതായി ആക്ഷേപമുണ്ട്.
കഴിഞ്ഞ ദിവസം പ്രസവത്തിന് ശേഷം ഇവിടെ നിന്ന് എസ്.എ.ടി ആശുപത്രിയിലേക്ക് റഫര് ചെയ്ത യുവതി മരിച്ച സംഭവത്തില് ആശുപത്രിക്കെതിരെ ബന്ധുക്കള് പരാതി നല്കി. നവജാത ശിശുവിന്റെ കൈയുടെ എല്ല് പൊട്ടിയെന്നും ഇടത് കൈക്ക് ചലനശേഷി നഷ്ടപ്പെട്ടെന്നും ആരോപിച്ച് കുടുംബം രംഗത്തെത്തി. ഇക്കഴിഞ്ഞ മാര്ച്ച് 27 നാണ് നെയ്യാറ്റിന്കരയിലെ ജനറല് ആശുപത്രിയില് വെച്ച് അവണാകുഴി സ്വദേശി പ്രജിത്തിന്റെ ഭാര്യ കാവ്യയുടെ പ്രസവം നടന്നത്. പ്രസവത്തിനിടെ കുഞ്ഞിന്റെ കൈക്ക് പൊട്ടലുണ്ടായെന്നും ഞരമ്പ് വലിഞ്ഞുപോയെന്നുമാണ് കുടുംബം പരാതിയില് പറയുന്നത്.
