ജിമെയിലിന്റെ മൊബൈല് ആപ്പില് നിര്മിത ബുദ്ധി അടിസ്ഥാനമാക്കിയുള്ള കിടിലന് ഫീച്ചറുകളുമായി ഗൂഗിള്. ജിമെയിലിലെ തിരയലുകള് കൂടുതല് കൃത്യതയുള്ളതാക്കി മാറ്റാനും ഇന്ബോക്സ് വളരെ എളുപ്പത്തില് ഉപയോഗിക്കുന്നതിനും മെഷീന് ലേണിങ് അധിഷ്ടിതമായ ചില സവിശേഷതകളാണ് കൊണ്ടുവരുന്നത്.
ജിമെയിലിന്റെ മൊബൈല് പതിപ്പ് ഉപയോഗിക്കുന്നവര് അവരുടെ ആപ്പില് പഴയ സന്ദേശങ്ങളോ അറ്റാച്ച്മെന്റുകളോ തിരയുമ്പോള് വൈകാതെ തന്നെ ‘ടോപ് റിസല്ട്ട്സ്’ എന്ന പുതിയ സെക്ഷന് കാണാന് തുടങ്ങുമെന്ന് ആല്ഫബെറ്റ് ഒരു ബ്ലോഗ് പോസ്റ്റില് പറഞ്ഞു. മെഷീന് ലേര്ണിങ് മോഡലുകള് ഉപയോഗിച്ചായിരിക്കും ടോപ് റിസല്ട്ട്സ് തയ്യാറാക്കുക.യൂസര്മാര്ക്ക് എന്താണ് വേണ്ടത് എന്നത് കണ്ടെത്തുന്നതിനായി തിരയുന്ന പദം ഉപയോഗിച്ച് അതുമായി ബന്ധപ്പെട്ട ഏറ്റവും പുതിയ ഇമെയിലുകളും മറ്റ് ‘പ്രസക്തമായ ഘടകങ്ങള്’ ഉപയോഗിച്ച് പഴയ ഇമെയിലുകളും സേര്ച്ച് റിസല്ട്ടില് കാണിക്കുമെന്ന് കമ്പനി പറയുന്നു.