തിരുവനന്തപുരം: ദ കേരള സ്റ്റോറി സിനിമയെ പ്രശംസിച്ച പ്രധാനമന്ത്രി നരേന്ദ്ര മോദിക്കെതിരെ എഎ റഹീം എംപി. വിദ്വേഷ സിനിമയെ പ്രകീര്ത്തിച്ചുകൊണ്ട് പ്രധാനമന്ത്രി തന്നെ നേരിട്ട് രംഗത്ത് വന്നിരിക്കുകയാണ്. ഇതോടെ ഈ വിദ്വേഷ സിനിമയ്ക്ക് പിന്നില് ആരാണെന്ന് ഏവര്ക്കും മനസ്സിലായല്ലോയെന്ന് എഎ റഹീം ചോദിച്ചു. സംസ്ഥാനത്ത് വര്ഗീയ ധ്രുവീകരണം ഉണ്ടാക്കി രാഷ്ട്രീയ നേട്ടമുണ്ടാക്കാന് രാജ്യത്തെ സംഘപരിവാര് ബുദ്ധികേന്ദ്രങ്ങളുടെ ആസൂത്രണമാണ് ഈ സിനിമയെന്നും ഫെയ്സ്ബുക്ക് പോസ്റ്റില് റഹീം പറഞ്ഞു.
രാജ്യത്ത് വിദ്വേഷം പടര്ത്തുന്നവര്ക്കെതിരെ ശക്തമായ നടപടി സ്വീകരിക്കേണ്ട പ്രധാനമന്ത്രി അതിനെ ന്യായീകരിക്കുന്നത് അങ്ങേയറ്റം ദൗര്ഭാഗ്യകരമാണ്. കേരളത്തിന്റെ യഥാര്ത്ഥ ചിത്രം ഇതല്ലെന്ന ഉത്തമ ബോധ്യം അദ്ദേഹത്തിനുണ്ട്. എന്നിട്ടും ഒരു വിദ്വേഷ സിനിമയെ മുന് നിര്ത്തി ഈ അഭിമാനകരമായ കേരളത്തെ അപമാനിക്കാന് പ്രധാനമന്ത്രി ശ്രമിക്കുന്നത് അങ്ങേയറ്റം പ്രതിഷേധാര്ഹമാണ്. പ്രസ്താവന പിന്വലിച്ചു പ്രധാനമന്ത്രി കേരളീയരോട് മാപ്പ് പറയണമെന്നും റഹീം ആവശ്യപ്പെട്ടു.
