കോന്നി : ബന്ധുക്കള് തമ്മിലുണ്ടായ സംഘര്ഷത്തെ തുടര്ന്ന് 45 കാരന് ചവിട്ടേറ്റ് മരിച്ചു. പ്രതിയെ കൂടല് പോലീസ് കസ്റ്റഡിയിലെടുത്തു. കുളത്തുമണ് അംബേദ്കര് ഉന്നതിയിലെ കാലായില് പടിഞ്ഞാറ്റേല് വീട്ടില് അനില് (കണ്ണന്) ആണ് മരിച്ചത്. കൊലപാതകവുമായി ബന്ധപ്പെട്ട് അനിലിന്റെ മൂത്ത ജേഷ്ഠന് സുനിലിന്റെ മകന് സുധീഷിനെ (27) കൂടല് പോലീസ് കസ്റ്റഡിയിലെടുത്തു. കഴിഞ്ഞ രാത്രി ഒന്പത് മണിയോടെ ആണ് സംഭവം നടന്നത്. ബന്ധുക്കള് തമ്മില് വാക്കേറ്റവും സംഘര്ഷവും രൂക്ഷമായപ്പോള് സമീപവാസികളാണ് കൂടല് പോലീസിനെ വിവരമറിയിക്കുന്നത്. പോലീസ് സ്ഥലത്തെത്തിയപ്പോഴേക്കും അനിലിനെ സുധീഷ് ചവിട്ടി താഴെയിട്ടിരുന്നു.
തുടര്ന്ന് പോലീസും ബന്ധുക്കളും ചേര്ന്ന് അനിലിനെ കോന്നി താലൂക്ക് ആശുപത്രിയില് എത്തിച്ചെങ്കിലും മരണം സംഭവിച്ചിരുന്നു. ചെങ്ങറയില് താമസിക്കുന്ന സുധീഷ് ഇടക്കിടെ അനിലിന്റെ വീട്ടില് എത്തുമ്പോള് വാക്കേറ്റവും ബഹളവും സൃഷ്ടിക്കുന്നത് പതിവായിരുന്നുവെന്ന് ബന്ധുക്കള് പറയുന്നു. മുന്പും ഇത്തരം സംഭവങ്ങള് ഉണ്ടായതിനെ തുടര്ന്ന് വീട്ടുകാര് കൂടല് പോലീസില് പരാതി നല്കിയിരുന്നു. സംഭവത്തില് പ്രതിയെ കസ്റ്റഡിയിലെടുത്തിട്ടുണ്ട്. അനിലിന്റെ മൃതദേഹം പോസ്റ്റ് മോര്ട്ടം നടപടികള്ക്ക് ശേഷം ബന്ധുക്കള്ക്ക് വിട്ടുനല്കും.
