പത്തനംതിട്ട : പത്തനംതിട്ട നഗരത്തിന്റെ ഹൃദയ ഭാഗത്ത് സ്ഥിതി ചെയ്യുന്ന സിവില് സ്റ്റേഷന് പുറകില് കൂടിയുള്ള റോഡില് ഓടയില് മലിനജലം നിറഞ്ഞ് പുഴുവരിച്ചു തുടങ്ങിയിട്ടും നഗരസഭാ അധികൃതര്ക്ക് അനക്കമില്ല. ഓട നിര്മ്മിച്ചതില് പിന്നെ ഇന്നുവരെ തുറന്നുകിടക്കുന്ന ഓടയ്ക്ക് മുകളില് സ്ലാബ് സ്ഥാപിക്കാന്പോലും കഴിഞ്ഞിട്ടില്ല. കെട്ടിക്കിടക്കുന്ന മാലിന്യത്തില് കൊതുകുകള് പെരുകുന്നുമുണ്ട്. വീടുകളില് നിന്നുള്ള കക്കൂസ് മാലിന്യങ്ങള് വരെ ഓടയിലേക്ക് ഒഴുക്കി വിടുന്നുണ്ടെന്നാണ് സമീപവാസികളില് ചിലര് ആരോപിക്കുന്നത്. മുമ്പ് സുഗമമായി വെള്ളം ഒഴുകി പൊയ്ക്കൊണ്ടിരുന്ന ഓടയുടെ ഒരു ഭാഗം മണ്ണിട്ട് നികത്തിയതും മാലിന്യം കെട്ടികിടക്കുന്നതിന് കാരണമായി. ഓട നിര്മ്മിച്ചശേഷം നഗരസഭ സ്ലാബ് സ്ഥാപിക്കാത്തത് അപകട ഭീഷണിയായതോടെ സമീപത്തെ വ്യാപാരികള് സ്വന്തം പണം മുടക്കി വ്യാപാര സ്ഥാപനങ്ങളിലേക്ക് കയറുന്ന വഴികളില് സ്ലാബ് സ്ഥാപിച്ചിട്ടുണ്ട്.
മലിനജലം കെട്ടിക്കിടന്ന് രോഗഭീതി വര്ധിച്ചപ്പോള് അധികൃതരെ വിവരം ധരിപ്പിച്ചു എങ്കിലും ഇവര് യാതൊരു നടപടിയും സ്വീകരിച്ചിട്ടില്ല. പന്നിയെലിയും മറ്റും ചത്ത് ദിവസങ്ങളോളം ഓടയില് കിടന്നാലും ആരും തിരിഞ്ഞു നോക്കാറില്ല. ഓടയില് നിറയുന്ന മലിനജലം സമീപത്തെ ജലാശയങ്ങള്ക്കും ഭീഷണിയായി മാറുന്നുണ്ട്. എലികള് കുഴിക്കുന്ന ദ്വാരങ്ങള് വഴി മാലിന്യം കുടിവെള്ളവുമായി കലരുവാന് സാധ്യതയുണ്ടെന്നും പ്രദേശവാസികള് പറയുന്നു. നിരവധി തവണ നാട്ടുകാര് നഗരസഭയിലും ആരോഗ്യ വകുപ്പിലും പരാതിപ്പെട്ടിട്ടും യാതൊരു നടപടിയുമില്ല. കോടതിയുടെ തൊട്ടടുത്തായാണ് ഈ മാലിന്യം കെട്ടികിടക്കുന്നത് എന്നതും എടുത്തുപറയണം.
