തിരുവല്ല: തിരുവല്ല എം.സി റോഡില് ഹെഡ് പോസ്റ്റ് ഓഫീസ് ജംഗ്ഷനും ബി.എസ്.എന്.എല് ഓഫീസിനും ഇടയില് റോഡിലേക്ക് ചാഞ്ഞു നില്ക്കുന്ന മരം അപകട ഭീഷണിയുയര്ത്തുന്നു. മരത്തിന്റെ വലിയ ശിഖരങ്ങള് എം.സി റോഡിലേക്ക് ചാഞ്ഞു നില്ക്കുകയാണ്. ശക്തമായ കാറ്റില് മരം ആടിയുലയുന്നതും കാണാം. ഈ നില തുടര്ന്നാല് മരം റോഡിലേക്ക് പതിക്കാനും സാധ്യത ഏറെയാണ്. നൂറുകണക്കിന് വാഹനങ്ങള് കടന്നുപോകുന്ന റോഡിന് സമീപമാണ് മരമുള്ളത്. മരത്തിന്റെ ഉണങ്ങിയ ശിഖരങ്ങള് റോഡിലേക്ക് ഒടിഞ്ഞു വീഴുന്നുമുണ്ട്. വിദ്യാര്ഥികള് ഉള്പ്പെടെ ദിവസം ഒട്ടേറെ ആളുകള് അപകടാവസ്ഥയിലായ ഈ മരത്തിന് ചുവട്ടില്കൂടി നടന്നുപോകുന്നുണ്ട്.
ഇതിന് സമീപത്തെ വെയ്റ്റിങ് ഷെഡില് ബസ് കയറാന് വരുന്നവര്ക്കും കൂറ്റന് മരം ഭീഷണിയാണ്. മരത്തിന്റെ ശിഖരങ്ങളുടെ അടിയില് കൂടിയാണ് വൈദ്യുതി ലൈന് കടന്നുപോകുന്നത്. ഈ വിഷയത്തില് കെ.എസ്.ഇ.ബി യും പൊതുമരാമത്ത് വകുപ്പും വലിയ അനാസ്ഥയാണ് കാട്ടുന്നത്. മരം മുറിച്ച് മാറ്റുന്നത് സംബന്ധിച്ച് പൊതു ജനങ്ങള് ചോദിച്ചാല് കെ.എസ്.ഇ.ബി യും പൊതുമരാമത്തും പരസ്പരം പഴിചാരി രക്ഷപെടുകയാണെന്ന് ജനങ്ങള് പറയുന്നു.
