കോന്നി : കനത്ത മഴയെ തുടർന്ന് വെള്ളം കയറിയ പ്രദേശങ്ങളിൽ കോന്നി ഗ്രാമപഞ്ചായത്തിന്റെ നേതൃത്വത്തിൽ മഹാശുചീകരണ യഞ്ജത്തിന് തുടക്കം കുറിച്ചു. മഠത്തിൽകാവ് പ്രദേശത്ത് വെള്ളം കയറി അടിഞ്ഞ് കൂടിയ ചെളിയും പ്ലാസ്റ്റിക് മാലിന്യങ്ങളും മന്നം മെമ്മോറിയൽ എൻ.എസ്.എസ് കോളേജിലെ എൻ.എസ്.എസ് യൂണിറ്റ് അംഗങ്ങളുടെ നേതൃത്വത്തിൽ നീക്കം ചെയ്തു. വാർഡ് അംഗം പ്രവീൺ പ്ലാവിളയിൽ, ജില്ലാ പഞ്ചായത്ത് അംഗം എസ്.സന്തോഷ് കുമാർ, പഞ്ചായത്ത് സെക്രട്ടി എച്ച്.അജിത്ത്, പഞ്ചായത്ത് ഹെൽത്ത് ഇൻസ്പെക്ടർ രഞ്ജിത ആർ.ആർ, എൻ.എസ്.എസ് യൂണിറ്റ് ചാർജ്ജ് ഓഫീസർ ദീപ്തി എന്നിവർ പ്രവര്ത്തനങ്ങള്ക്ക് നേതൃത്വം നൽകി.
സമീപത്ത് വെള്ളം കയറിയ വീടും എൻ.എസ്.എസ് യൂണിറ്റ് ശുചീകരിച്ചു. മാമ്മൂട് 37ആം നമ്പർ അങ്കണവാടി എക്സൈസ് കോന്നി സ്റ്റേഷന്റെ നേതൃത്വത്തിൽ ശുചീകരിച്ചു. ഗ്രാമ പഞ്ചായത്ത് അംഗം സുജിത്ത് ബാലഗോപാൽ, അസിസ്റ്റന്റ് എക്സൈസ് ഇൻസ്പെക്ടർ സുരേഷ്, എക്സൈസ് ഓഫീസർമാരായ സജിമോൻ, മഹേഷ് എന്നിവർ നേതൃത്വം നൽകി. കോന്നി അട്ടച്ചാക്കൽ പ്രദേശത്തെ വെള്ളം കയറിയ നിരവധി കിണറുകളും ശുചീകരിച്ച് ക്ലോറിനേഷൻ നടത്തി. ഗ്രാമ പഞ്ചായത്ത് അംഗം കെ.പി ശിവദാസ്, ആരോഗ്യ പ്രവർത്തകരായ ഷിബു(ജെ.എച്ച്.ഐ), ബിന്ദു സി.കെ(ജെ.പി.എച്ച്.എന്), മഞ്ജു ചെല്ലപ്പൻ ആശാപ്രവർത്തകരായ ശാന്തി വിജയൻ, ഗീത മോഹൻ, സുമ എസ്. എന്നിവർ നേതൃത്വം നൽകി.
കോന്നി ടൗൺപ്രദേശത്തെ പ്ലാസ്റ്റിക് മാലിന്യങ്ങൾ ജനപ്രതിനിധികൾ, ഗ്രാമപഞ്ചായത്ത് ഉദ്യോഗസ്ഥർ, ഹരിത കർമ്മസേന പ്രവർത്തകർ എന്നിവരുടെ നേതൃത്വത്തിൽ നീക്കം ചെയ്തു. എലിയറയ്ക്കൽ ഗാന്ധിഭവൻ, സ്നേഹാലയം എന്നീ സ്ഥാപനങ്ങളിലെയും അട്ടച്ചാക്കൽ, മങ്ങാരം വാർഡുകളിലെയും കിണറുകൾ ശുചീകരിച്ചു. ഗ്രാമപഞ്ചായത്തിലെ മറ്റു വാർഡുകളിലെ കിണറുകൾ ശുചീകരിക്കുന്നതിന് 24 മണിക്കൂറും ശുചീകരണ സേന വാർഡുകളിൽ പ്രവർത്തിക്കുന്നുണ്ടെന്നും കോന്നി ഗ്രാമ പഞ്ചായത്ത് അധികൃതര് അറിയിച്ചു.
