ലണ്ടന്: കുഞ്ഞുപിറന്ന സന്തോഷ വാര്ത്ത പങ്കുവെച്ചതിന് പിന്നാലെ യുകെയില് മലയാളി ആശുപത്രിയില് കുഴഞ്ഞുവീണ് മരിച്ചു. പത്തനംതിട്ട പുന്നവേലി സ്വദേശിയായ ഷൈജു സ്കറിയ ജയിംസ് (37) ആണ് മരിച്ചത്. ഷൈജുവിന്റെ ഭാര്യ നിത്യ നാല് ദിവസം മുമ്പാണ് സിസേറിയനിലൂടെ പെണ്കുഞ്ഞിന് ജന്മം നല്കിയത്. ഇതിന്റെ സന്തോഷ വാര്ത്ത ഷൈജു ഫേസ്ബുക്കില് പങ്കുവെച്ചിരുന്നു. ഇതിന് പിന്നാലെയാണ് മരണം സംഭവിച്ചത്.
നിത്യയുടെ പ്രസവവുമായി ബന്ധപ്പെട്ട് ആശുപത്രിയില് തന്നെയായിരുന്ന ഷൈജു തിങ്കളാഴ്ചയാണ് മകനെ സ്കൂളില് വിടുന്നതിനായി വീട്ടിലേക്ക് മടങ്ങിയിരുന്നു. മകനെ സ്കൂളില് വിട്ട ശേഷം ആശുപത്രിയില് മടങ്ങിയെത്തി. ഉച്ചയോടെ ആശുപത്രിയുടെ ശുചിമുറിയില് പോയ ശേഷം മടങ്ങിയെത്താമെന്ന് പറഞ്ഞ ഷൈജു തിരിച്ചെത്താന് വൈകി. തുടര്ന്ന് നടത്തിയ അന്വേഷണത്തിലാണ് ഷൈജുവിനെ മരിച്ച നിലയില് കണ്ടെത്തിയത്. ഭാര്യ നിത്യ പ്ലിമത്ത് യൂണിവേഴ്സിറ്റി ആശുപത്രിയില് ന്യൂറോ സര്ജറി യൂണിറ്റില് നഴ്സാണ്. പുന്നവേലി മുളയംവേലി മുരിക്കനാനിക്കല് വീട്ടില് ജെയിംസ് ജോസഫിന്റെയും ജോളിമ്മയുടെയും മകനാണ് മരിച്ച ഷൈജു. മക്കള് – ആരവ് (5), അന്ന (4 ദിവസം).
