പീരുമേട് : അഴുത ബ്ലോക്ക് പഞ്ചായത്തിന്റെ ആസൂത്രണ സമിതി യോഗം ചേർന്നു. അഴുത ബ്ലോക്ക് പഞ്ചായത്ത് കോൺഫറൻസ് ഹാളിൽ ചേർന്ന യോഗം ബ്ലോക്ക് പ്രസിഡണ്ട് പി. മാലതി ഉദ്ഘാടനം ചെയ്തു. ബ്ലോക്ക് പഞ്ചായത്ത് വൈസ് പ്രസിഡണ്ട് ആർ. സെൽവത്തായി അധ്യക്ഷത വഹിച്ചു. 2024 – 25 വാർഷിക പദ്ധതിയിൽ ഉൾപ്പെടുത്തേണ്ട വിഷയങ്ങളെ സംബന്ധിച്ച് ബ്ലോക്ക് പഞ്ചായത്ത് അംഗങ്ങളും ആസൂത്രണ സമിതി അംഗങ്ങളും വിശദമായി ചർച്ച ചെയ്തു. അഴുത ബ്ലോക്കിന് കീഴിൽ വരുന്ന ആറ് പഞ്ചായത്തുകളിലെ 110 വാർഡുകളിൽ നിന്ന് 500 പേർക്ക് തൊഴിൽ നൽകുക എന്നതാണ് പ്രഥമ ലക്ഷ്യം.
എല്ലാ വാർഡുകളിലും ശുദ്ധജല ലഭ്യത ഉറപ്പുവരുത്തുക, കാർഷിക മേഖലയ്ക്ക് മുൻതൂക്കം നൽകുക, തുടർ പദ്ധതികളുടെ പൂർത്തീകരണം, വന്യമൃഗ ശല്യത്തിൽ നിന്ന് കർഷകരെയും പൊതു ജനങ്ങളെയും സംരക്ഷിക്കാൻ വേണ്ട പദ്ധതികൾ ആവിഷ്കരിക്കുക, യുവജനങ്ങളുടെ കായിക ശേഷി വളർത്തുന്നതിനായി ബ്ലോക്ക് പഞ്ചായത്തിന്റെ കീഴിലുള്ള ആറു പഞ്ചായത്തുകളിലും കളിസ്ഥലങ്ങൾ നിർമ്മിക്കുക, പീരുമേട് താലൂക്ക് ആശുപത്രിയുടെ അടിസ്ഥാന വികസന പ്രവർത്തനങ്ങളും പുതിയ പദ്ധതികളിൽ ഉൾപ്പെടുത്തുക എന്നിവക്കാണ് പ്രധാനമായും ഊന്നൽ നൽകിയത്. സെക്രട്ടറി ആർ. വെള്ളയന്, ജോയിന്റ് ബി.ഡി.ഒ സജി പീറ്റർ ആസൂത്രണ സമിതി അംഗങളായ.എസ്. വാസു, പി.കെ ഗോപിനാഥൻ, ഹരിദാസ്, സുനിൽ ജോസഫ് , വി .എസ് പ്രസന്നൻ എന്നിവർ പങ്കെടുത്തു.
