പുതുച്ചേരി : പഠനത്തില് മിടുക്കനായ എട്ടാം ക്ലാസുകാരനെ സഹപാഠിയുടെ അമ്മ വിഷം കൊടുത്തുകൊന്നു. കാരയ്ക്കല് നെഹ്റു നഗറിലെ സ്വകാര്യ സ്കൂളിലെ എട്ടാം ക്ലാസ് വിദ്യാര്ഥി ബാലമണികണ്ഠനാണ് മരിച്ചത്. ജൂസ് പാക്കറ്റില് വിഷം ചേര്ത്തശേഷം കുട്ടിക്കു നല്കുകയായിരുന്നു.ബാലമണികണ്ഠന് ഇന്നലെ ക്ലാസ് കഴിഞ്ഞു വീട്ടിലെത്തിയതിനു ശേഷം ഛര്ദിച്ച് കുഴഞ്ഞുവീണിരുന്നു.ഉടനെ ആശുപത്രിയിൽ എത്തിച്ചപ്പോൾ, വിഷം അകത്തുചെന്നിട്ടുള്ളതായി ഡോക്ടര്മാര് സംശയം പ്രകടിപ്പിച്ചു. സ്കൂളിലെ സുരക്ഷാ ജീവനക്കാരന് ജൂസ് നല്കിയിരുന്നതായി കുട്ടി പിന്നീട് പറഞ്ഞു.
ഇതനുസരിച്ച് സ്കൂളിലെ സുരക്ഷാ ജീവനക്കാരന് ദേവദാസിനെ മാതാപിതാക്കളും സ്കൂള് അധികൃതരും ചോദ്യം ചെയ്തു. കുട്ടിയുടെ ബന്ധുവെന്നു പറഞ്ഞെത്തിയ സ്ത്രീയാണ് ജൂസ് പാക്കറ്റ് നല്കാന് ഏല്പ്പിച്ചതെന്നായിരുന്നു ഇയാളുടെ മൊഴി. സിസിടിവി ക്യാമറകളില് പതിഞ്ഞ ദൃശ്യങ്ങള് പരിശോധിച്ചപ്പോള് കുട്ടിയുടെ അമ്മയായ സഹായറാണി വിക്ടോറിയ എന്ന സ്ത്രീയാണു സുരക്ഷാ ജീവനക്കാരന് ജൂസ് പാക്കറ്റ് കൈമാറിയതെന്നു കണ്ടെത്തി.
കാരയ്ക്കല് സിറ്റി പോലീസ് സഹായറാണിയെ കസ്റ്റഡിയിലെടുത്ത് ചോദ്യം ചെയ്തപ്പോഴാണു ക്രൂരതയുടെ കാരണം വെളിപ്പെടുത്തിയത്. പരീക്ഷകളില് തന്റെ മകനേക്കാള് മണികണ്ഠന് മികച്ച മാര്ക്കു നേടുന്നതാണു വിഷം നല്കാനുള്ള കാരണമെന്നാണു മൊഴി നല്കി.ചികിത്സയിലിരിക്കെ രാത്രി വൈകിട്ടോടെ മണികണ്ഠന് മരിച്ചു. സഹായറാണിയുടെ അറസ്റ്റ് പോലീസ് രേഖപ്പെടുത്തി. വിശദമായ അന്വേഷണം തുടങ്ങിയതായി കാരയ്ക്കല് എസ്പി അറിയിച്ചു.
