പത്തനംതിട്ട : പത്തനംതിട്ട സ്വകാര്യ ബസ് സ്റ്റാന്റിന് സമീപം നിര്മ്മാണം നടക്കുന്ന ഓടയില്കൂടി കടന്നു പോകുന്ന ജല വിതരണ പൈപ്പ് പൊട്ടിയതിനെ തുടര്ന്ന് വെള്ളം മണിക്കൂറുകളോളം പാഴായി. പുലര്ച്ചെയായിരുന്നു സംഭവം. നിര്മ്മാണം നടക്കുന്ന മേല്പ്പാലത്തിന് താഴെ നിര്മ്മിക്കുന്ന പുതിയ ഓടയുടെ ഉള്ളില് കൂടി കടന്നുപോകുന്ന ജല വിതരണ പൈപ്പാണ് പൊട്ടിയത്. പൈപ്പ് കൂട്ടിച്ചേര്ത്തിരിക്കുന്ന ഭാഗം പൊട്ടി രണ്ടായി ഊരി മാറിയതാണ് വെള്ളം പാഴാകാന് കാരണമായത്. പമ്പ് ഹൗസില് നിന്നും വെള്ളം തുറന്നു വിട്ട സമയം പൈപ്പ് പൊട്ടിയതിനെ തുടര്ന്ന് നിമിഷനേരത്തിനുള്ളില് തന്നെ നിര്മ്മാണം നടക്കുന്ന ഓടയില് വെള്ളം നിറയുകയായിരുന്നു.
കഴിഞ്ഞ ദിവസം ഓടനിര്മ്മാണത്തിനായി മണ്ണ് മാറ്റിയ ഭാഗത്ത് കൂടി കടന്നുപോകുന്ന പി.വി.സി പൈപ്പ് ലൈനിന്റെ ജോയിന്റ് രണ്ടായി ഊരിപ്പോയിരുന്നു. ഇതിന്റെ അറ്റകുറ്റപ്പണികള് നടത്തിയെങ്കിലും പൈപ്പ് ശരിയായ രീതിയില് പശതേച്ച് കൂട്ടിച്ചേര്ത്തിരുന്നില്ല എന്നാണ് സമീപത്തെ ഓട്ടോ തൊഴിലാളികളും വ്യാപാരികളും പറയുന്നത്. പത്തനംതിട്ട നഗരത്തില് പലയിടത്തും കുടിവെള്ള ക്ഷാമം രൂക്ഷമാകുന്ന സാഹചര്യത്തിലാണ് വാട്ടര് അതോറിറ്റിയുടെ അനാസ്ഥ കാരണം ഇത്രയധികം കുടിവെള്ളം പാഴായിപോയത്.
