പത്തനംതിട്ട : സ്ഥാനം ഏറ്റെടുത്തതിന് ശേഷം ആദ്യമായി ജില്ലയില് എത്തിച്ചേരുന്ന മുഖ്യമന്ത്രി വി.ഡി.സതീശന് ഒക്ടോബര് ഒന്നിന് ജില്ലാ കോണ്ഗ്രസ് കമ്മിറ്റിയുടെ നേതൃത്വത്തില് പത്തനംതിട്ട രാജീവ് ഭവനില് സ്വീകരണം നല്കുമെന്ന് ഡി.സി.സി. സംഘടനാകാര്യ ജനറല് സെക്രട്ടറി സാമുവല് കിഴക്കുപുറം അറിയിച്ചു. ഉച്ചയ്ക്ക് രണ്ടുമണിക്ക് ഡി.സി.സി. പ്രസിഡന്റ് പ്രൊഫ.സതീഷ് കൊച്ചുപറമ്പിലിന്റെ അധ്യക്ഷതയില് ചേരുന്ന സമ്മേളനത്തില് കെ.പി.സി.സി. രാഷ്ട്രീയകാര്യ സമിതി അംഗങ്ങള്, കെ.പി.സി.സി., ഡി.സി.സി, പോഷക സംഘടന നേതാക്കള്, ജില്ലയിലെ കോണ്ഗ്രസ് എം.എല്.എ.മാര് എന്നിവര് പ്രസംഗിക്കും. ജില്ലയിലെ കോണ്ഗ്രസിന്റെയും പോഷക സംഘടനകളുടെയും വിവിധ തലങ്ങളിലുള്ള ഭാരവാഹികളും തദ്ദേശ സ്വയംഭരണ സ്ഥാപനങ്ങളിലെ ജനപ്രതിനിധികളും പങ്കെടുക്കുമെന്ന് ഡി.സി.സി. സാമുവേല് കിഴക്കുപുറം അറിയിച്ചു.
പശ്ചിമഘട്ട പരിസ്ഥിതിലോല വനമേഖലയായി കരട് വിജ്ഞാപനത്തില് ഉള്പ്പെട്ടിട്ടുള്ള ജില്ലയിലെ ജനവാസ പ്രദേശങ്ങളായ കൊല്ലമുള, പെരുനാട്, വടശ്ശേരിക്കര, സീതത്തോട്, ചിറ്റാര്, തണ്ണിത്തോട്, അരുവാപ്പുലം വില്ലേജുകളെ അന്തിമ വിജ്ഞാപനത്തില് നിന്നും ഒഴിവാക്കി പരിസ്ഥിതിലോല പ്രദേശം വനമേഖലയില് നിജപ്പെടുത്തണമെന്നാവശ്യപ്പെട്ടുള്ള ജില്ല കോണ്ഗ്രസ് കമ്മിറ്റിയുടെ നിവേദനം ഡി.സി.സി. പ്രസിഡന്റ് പ്രൊഫ.സതീഷ് കൊച്ചുപറമ്പില് മുഖ്യമന്ത്രിക്ക് കൈമാറും. സ്വീകരണ സമ്മേളനത്തില് പങ്കെടുക്കുവാന് എത്തിച്ചേരുന്ന നേതാക്കളും പ്രവര്ത്തകരും ഉച്ചയ്ക്ക് 1.45 ന് മുന്പായി രാജീവ് ഭവന് ഓഡിറ്റോറിയത്തില് പ്രവേശിക്കണം.
