കോന്നി : കോന്നി ബ്ലോക്ക് പഞ്ചായത്തിന്റെ പരിധിയിൽ വരുന്ന തൃതല പഞ്ചായത്തുകളിൽ കാര്യമായ തോതിൽ പോളിംഗ് നടന്നു. രാവിലെ ഏഴ് മണി മുതൽ അരുവാപ്പുലം, കോന്നി, പ്രമാടം, മലയാലപ്പുഴ, തണ്ണിത്തോട്, വള്ളിക്കോട്, മൈലപ്ര തുടങ്ങിയ പഞ്ചായത്തുകളുടെ വിവിധ പോളിംഗ് സ്റ്റേഷനുകളിൽ നല്ല രീതിയിൽ പോളിംഗ് നടന്നു. സ്ത്രീകളുടെയും പുരുഷൻമാരുടെയും നീണ്ട നിരകാണാമായിരുന്നു. ഉച്ചക്ക് ഒരു മണി ആയപ്പോഴേക്കും 46% പോളിംഗ് രേഖപ്പെടുത്തി. 154 ബൂത്തുകളിലായി 125814 വോട്ടർമാർ ആണ് നിലവിൽ ഉള്ളത്. 68068 വോട്ടർമാർ വനിതകളാണ്. 57746 വോട്ടർമാർ പുരുഷന്മാരുമാണ്. പ്രമാടം പഞ്ചായത്തിൽ ആണ് ഏറ്റവും കൂടുതൽ വോട്ടർമാർ. ഇവിടെ നാല്പതു ബൂത്തുകൾ ആണ് ക്രമീകരിച്ചത്.
1693 വോട്ടർമാരുള്ള മല്ലശേരിയാണ് ഏറ്റവും വലിയ ബൂത്ത്. ഏറ്റവും കുറവ് വോട്ടർമാർ ഉള്ളത് അരുവാപ്പുലം പഞ്ചായത്തിലെ ആവണിപ്പാറ ബൂത്ത് ആണ്. ഇവിടെ 72 വോട്ടർമാർ ആണുള്ളത്.4 മണി ആയപ്പോഴേക്കും 59 പേര് വോട്ട് രേഖപ്പെടുത്തിക്കഴിഞ്ഞു. മുൻകാല തിരഞ്ഞെടുപ്പുകളിൽ ഈ ബൂത്തിൽ 25 വോട്ടുകളിൽ കൂടുതൽ നടക്കാറില്ല. അതിൽ നിന്ന് വത്യസ്തമായാണ് 59 വോട്ടുകൾ നടന്നത്. പോളിംഗ് അവസാനിച്ച് ജനങ്ങളുടെ വിരൽ അടയാളം മിഷീനിൽ പതിഞ്ഞതോടെ ഇനി 13ആം തീയതി വരെ സ്ഥാനാർഥികളുടെ നെഞ്ചിടിപ്പ് വർധിക്കും.
