പത്തനംതിട്ട : ജില്ലയിലെ ഓമല്ലൂർ പൈവള്ളി ഭാഗത്ത് വീട്ടിനുള്ളിൽ നിൽക്കുകയായിരുന്ന മൂന്ന് വയസ്സുകാരിയെ തെരുവുനായ കടിച്ചുകീറി. ഓമല്ലൂർ സ്വദേശിനിയായ സുകന്യ എന്ന കുഞ്ഞിനാണ് ആക്രമണത്തിൽ ഗുരുതരമായി പരുക്കേറ്റത്. ഉച്ചയ്ക്ക് 12:30-ഓടെ അടുക്കളവാതിൽ വഴി വീട്ടിനുള്ളിൽ കടന്ന നായ കുഞ്ഞിനെ ആക്രമിക്കുകയായിരുന്നു. നായയുടെ ആക്രമണത്തിൽ കുഞ്ഞിന്റെ കണ്ണിനും മുഖത്തിനും മാരകമായ മുറിവുകളേറ്റു. കുഞ്ഞിനെ ആദ്യം പത്തനംതിട്ട ജനറൽ ആശുപത്രിയിൽ പ്രവേശിപ്പിച്ചെങ്കിലും പരുക്ക് ഗുരുതരമായതിനാൽ കോട്ടയം മെഡിക്കൽ കോളേജിലേക്ക് അടിയന്തിരമായി മാറ്റി.
സുകന്യയെ ആക്രമിക്കുന്നതിന് മുൻപ് ഇതേ നായ തന്നെ രാവിലെ പ്രദേശത്തെ ഒരു വൈദികനെയും രാജൻ എന്ന നാട്ടുകാരനെയും കടിച്ചിരുന്നു. ആക്രമണം നടത്തിയ നായയ്ക്ക് പേവിഷബാധയുടെ ലക്ഷണങ്ങൾ ഉണ്ടോ എന്ന് നാട്ടുകാർ സംശയിക്കുന്നുണ്ട്. ഒരു ചുമന്ന നിറത്തിലുള്ള നായയാണ് കുട്ടിയെ ആക്രമിച്ചതെന്ന് നാട്ടുകാർ പറയുന്നു.
