അടൂര് : ഓടികൊണ്ടിരുന്ന സ്വകാര്യ ബസിന്റെ ടയര് ഊരിത്തെറിച്ചെങ്കിലും ഡ്രൈവറുടെ സമയോചിതമായ ഇടപെടലിനെ തുടര്ന്ന് അപകടം ഒഴിവായി. അടൂര് – കെ.പി റോഡില് മരിയ ഹോസ്പിറ്റലിന് സമീപമാണ് അപകടം നടന്നത്. ഏനാത്ത് – അടൂര് റൂട്ടില് ഓടുന്ന ശ്രീമുരുകന് ബസിന്റെ ടയറാണ് യാത്രക്കിടെ ഊരിപ്പോയത്. അപകടം മനസിലാക്കിയ ഡ്രൈവര് പതറാതെ ബസ് തക്ക സമയത്ത് നിര്ത്തിയതിനെ തുടര്ന്ന് വലിയ അപകടം ഒഴിവാകുകയായിരുന്നു. അടൂര് മരിയ ജംഗ്ഷനില് എത്തുന്നതിന് മുന്പ് തന്നെ അപകടം തിരിച്ചറിഞ്ഞിരുന്നു.
ബസ് ജീവനക്കാര് ഈ കാര്യം വര്ക്ക് ഷോപ്പില് അറിയിക്കുകയും യാത്രക്കാരെ ഇറക്കിയ ശേഷം ബസുമായി വരാന് വര്ക്ക്ഷോപ്പ് ജീവനക്കാര് പറഞ്ഞതിനെ തുടര്ന്ന് സാവധാനമാണ് ബസ് മുന്നോട്ട് പോയത്. ഇതിനിടെ ടയര് ഊരി പോവുകയും സമീപത്തെ വെയ്റ്റിംഗ് ഷെഡിലേക്ക് ഇടിച്ചു കയറുകയുമായിരുന്നു. ടയര് ഉരുണ്ടു വരുന്നത് കണ്ട് ആളുകള് ഓടി മാറിയതിനാല് കൂടുതല് അപകടങ്ങള് സംഭവിച്ചില്ല.
