ചെന്നൈ : സിഐഎസ്എഫ് ക്യാമ്പിലെ പരിശീലനത്തിനിടെ അബദ്ധത്തിൽ വെടിയേറ്റ് 11 വയസ്സുകാരന് പരിക്ക്. തമിഴ്നാട്ടിലെ പുതുക്കോട്ടയിലാണ് സംഭവം. വീട്ടിലിരിക്കുകയായിരുന്ന കുട്ടിക്കാണ് വെടിയേറ്റത്. പുതുക്കോട്ടയിലെ ബന്ധുവീട്ടിൽ എത്തിയതാണ് കുട്ടി. രാവിലെ ഭക്ഷണം കഴിക്കുന്നതിനിടെയാണ് തലയ്ക്ക് വെടിയേറ്റത്.
രണ്ട് വെടിയുണ്ടകളാണ് വീടിന് നേരെ വന്നത്. ഇതിൽ ഒന്ന് ഭിത്തിയിൽ തറച്ചു. മറ്റൊന്നാണ് കുട്ടിയുടെ തലയിൽ തറച്ചത്. ഇതിനുമുമ്പും സമാനമായ സംഭവങ്ങൾ ഇവിടെ ഉണ്ടായിട്ടുള്ളതായി പ്രദേശവാസികൾ പറയുന്നു. പുതുക്കോട്ടയിലെ സർക്കാർ ആശുപത്രിയിൽ ചികിത്സയിലുള്ള കുട്ടിയുടെ ആരോഗ്യനില ഗുരുതരമായി തുടരുകയാണ്.
