തൃശ്ശൂർ : വിയ്യൂർ പാലത്തിന് സമീപം നിയന്ത്രണം വിട്ട ലോറി ഡിവൈഡറിൽ ഇടിച്ച് മറിഞ്ഞു. തൃശ്ശൂർ ഭാഗത്തുനിന്ന് വടക്കാഞ്ചേരി ഭാഗത്തേക്ക് വരികയായിരുന്ന ലോറിയാണ് അപകടത്തിൽപ്പെട്ടത് . നിയന്ത്രണം നഷ്ടപ്പെട്ട ലോറി ഡിവൈഡറിൽ ഇടിച്ച് മറിയുകയും, എതിരെ വടക്കാഞ്ചേരിയിൽ നിന്ന് തൃശ്ശൂർ ഭാഗത്തേക്ക് വരികയായിരുന്ന കാറിൽ ഇടിക്കുകയുമായിരുന്നു. അപകടത്തെത്തുടർന്ന് പ്രദേശത്ത് വലിയ രീതിയിലുള്ള ഗതാഗത തടസ്സം അനുഭവപ്പെട്ടു. ഏതാണ്ട് അരമണിക്കൂറോളം ഗതാഗതം പൂർണ്ണമായും സ്തംഭിച്ച നിലയിലായിരുന്നു. അപകടത്തിൽപ്പെട്ട കാറിന് കാര്യമായ കേടുപാടുകൾ സംഭവിച്ചിട്ടുണ്ട്.
കാറിലുണ്ടായിരുന്ന രണ്ടുപേർക്കും ലോറി ഡ്രൈവർക്കും ഗുരുതരമായ പരിക്കുകൾ ഇല്ലെന്നത് ആശ്വാസകരമാണ്. ഇവർ സ്വകാര്യ ആശുപത്രിയിൽ പ്രാഥമിക ചികിത്സ തേടി. ലോറിക്ക് തൊട്ടുപിന്നാലെ വന്ന ഒരു ഇരുചക്രവാഹന യാത്രക്കാരൻ അത്ഭുതകരമായാണ് അപകടത്തിൽ നിന്ന് രക്ഷപ്പെട്ടത്. അപകടത്തിന് പിന്നാലെ ലോറിയിൽ നിന്നും ഇന്ധനം ചോരുന്ന സാഹചര്യം ഉണ്ടായെങ്കിലും ഫയർഫോഴ്സ് ഉദ്യോഗസ്ഥരെത്തി പ്രദേശം വൃത്തിയാക്കി.
