പ്രമാടം : പൂങ്കാവ് – പ്രമാടം റോഡിലെ ഈറ വില്പന കേന്ദ്രത്തിന് സമീപം കൊടും വളവില് വാഹനാപകടങ്ങള് തുടര്ക്കഥയായിട്ടും അപകടങ്ങള് കുറയ്ക്കുവാന് നടപടി സ്വീകരിക്കാതെ അധികൃതര്. വാഹനങ്ങളുടെ അമിത വേഗതയും വളവുകളില് കൃത്യമായ ട്രാഫിക് സുരക്ഷാ സംവിധാനങ്ങളുമില്ലാത്തതാണ് അപകടങ്ങള്ക്ക് കാരണമായി തീരുന്നത്. മാസങ്ങള്ക്ക് മുന്പ് ഇവിടെ നടന്ന അപകടത്തില് സമീപവാസി മരണപ്പെട്ടിരുന്നു. കഴിഞ്ഞ ദിവസമാണ് കേറ്ററിംഗ് സ്ഥാപനത്തിന്റെ വാന് നിയന്ത്രണം വിട്ട് ഇലക്ട്രിക് പോസ്റ്റില് ഇടിച്ച് അപകടം നടന്നത്. വര്ഷങ്ങളായി ഈ ഭാഗത്ത് നിരവധി അപകടങ്ങളാണ് നടന്നിട്ടുള്ളത്. ഇത് സംബന്ധിച്ച് നാട്ടുകാര് നിരവധി തവണ ജനപ്രതിനിധികള്ക്ക് പരാതി പരാതി നല്കിയിരുന്നുവെങ്കിലും യാതൊരു നടപടിയും ഉണ്ടായിട്ടില്ല.
റോഡില് വേഗത നിയന്ത്രിക്കുവാന് ആവശ്യമായ സംവിധാനങ്ങള് ഒരുക്കുകയും വളവുകളില് മിററുകള് സ്ഥാപിക്കുകയും ചെയ്തെങ്കില് മാത്രമേ ഇവിടെ നടക്കുന്ന അപകടങ്ങള് പകുതിയെങ്കിലും കുറയ്ക്കുവാന് കഴിയു എന്നാണ് പ്രദേശവാസികളും നാട്ടുകാരും പറയുന്നത്. അപകട മേഖലകളില് വാഹനയാത്രക്കാര്ക്ക് ആവശ്യമായ മുന്നറിയിപ്പ് ബോര്ഡുകളും സ്ഥാപിച്ചിട്ടില്ല. പത്തനംതിട്ട നഗരത്തെയും പ്രമാടം ഗ്രാമപഞ്ചായത്തിനെയും തമ്മില് ബന്ധിപ്പിക്കുന്ന പ്രധാന പാതയാണിത്. എന്നിട്ടും സുരക്ഷയൊരുക്കുവാന് ഇപ്പോഴും വിമുഖത കാട്ടുകയാണ് അധികാരികള്.
