ന്യൂഡല്ഹി : ആധാര് നമ്പറിനും അതിന്റെ സ്ഥിരീകരണത്തിനുമല്ലാതെ ഇതുമായി ബന്ധപ്പെട്ട ബയോമെട്രിക് വിവരങ്ങള് പങ്കിടാന് സാധിക്കില്ലെന്ന് ഹൈക്കോടതിയില് വ്യക്തമാക്കി ഭാരതീയ സവിശേഷ തിരിച്ചറിയല് അതോറിറ്റി (യുഐഡിഎഐ). വിവരങ്ങള് പങ്കിടുന്നത് അനുവദനീയമല്ലെന്ന് യുഐഡിഎഐ ഡല്ഹി ഹൈക്കോടതിയെയാണ് അറിയിച്ചത്. ഒരു കേസിലെ പ്രതിയെ ആധാര് വിവരങ്ങള് പരിശോധിച്ച് തിരിച്ചറിയണമെന്ന ഹര്ജിയിലാണ് യുഐഡിഎഐ നിലപാട് വ്യക്തമാക്കിയത്.
ഒരു കൊലപാതക, കവര്ച്ച കേസില് പ്രതിയുടെ വിരലടയാളവും ഫോട്ടോയും ആധാര് രേഖകളുമായി താരതമ്യം ചെയ്ത് കണ്ടെത്താന് നിര്ദേശം നല്കണമെന്നായിരുന്നു പ്രോസിക്യൂഷന്റെ ആവശ്യം. ഓരോ വ്യക്തിയുടെയും ബയോമെട്രിക് വിവരങ്ങള് സവിശേഷമാണെന്നും അതു രഹസ്യമായി സൂക്ഷിക്കേണ്ടതുണ്ടെന്നും ദുരുപയോഗിക്കുന്നത് ആധാര് നിയമത്തിലെ 29ാം വകുപ്പിന്റെ ലംഘനമാണെന്നും അതോറിറ്റി കോടതിയില് വിശദീകരിച്ചു. ഇന്ത്യന് പൗരന്മാരുടെ സവിശേഷത ഉറപ്പാക്കുന്നതിനാണ് ബയോമെട്രിക് വിവരങ്ങള് യുഐഡിഎഐ ശേഖരിച്ചതെന്നും അതു മറ്റൊന്നിനും ഉപയോഗിക്കാനാവില്ലെന്നും യുഐഡിഎഐ വ്യക്തമാക്കി.