കോഴിക്കോട്: വൃത്തിഹീനമായി പ്രവര്ത്തിച്ചിരുന്ന ആറ് സ്ഥാപനങ്ങള് ഭക്ഷ്യസുരക്ഷാ വകുപ്പ് പൂട്ടിച്ചു. നാല് ദിവസത്തിനിടെ നടത്തിയ പരിശോധനയിലാണ് കോഴിക്കോട് 6 സ്ഥാപനങ്ങള് അധികൃതര് പൂട്ടിച്ചത്. ഹോട്ടലുകളിലും കോഫി ഷോപ്പുകളിലും കൂള്ബാറിലുമായിരുന്നു ഭക്ഷ്യസുരക്ഷാ വകുപ്പിന്റെ പരിശോധന. മാനദണ്ഡങ്ങള് പാലിക്കാത്തതും വൃത്തിഹീനവുമായ സ്ഥാപനങ്ങളാണ് പൂട്ടിയത്. ഇവിടങ്ങളില് നിന്ന് പഴകിയ ഇറച്ചിയും മല്സ്യവും പിടികൂടി.
കാസര്ഗോഡ്, വയനാട്, മലപ്പുറം ജില്ലകളിലടക്കം ഭക്ഷ്യവിഷബാധ ഉണ്ടായതിനെ തുടര്ന്നാണ് കോഴിക്കോട് ജില്ലയിലും ഭക്ഷ്യസുരക്ഷാ വകുപ്പ് പരിശോധന കര്ശനമാക്കിയത്. ജില്ലയുടെ വിവിധ ഭാഗങ്ങളില് ഇന്നും പരിശോധന നടക്കുന്നുണ്ട്. അതേസമയം രണ്ട് വര്ഷത്തിനിടെ 25 ലക്ഷം രൂപയാണ് ഭക്ഷ്യസുരക്ഷാ നിയമലംഘനത്തിന് കോഴിക്കോട് ജില്ലയില് നിന്നും പിഴയായി ഈടാക്കിയത്. 249 ക്രിമിനല് കേസുകളും 458 സിവില് കേസുകളും ഇതുമായി ബന്ധപ്പെട്ട് രജിസ്റ്റര് ചെയ്തിട്ടുണ്ട്.
