തിരുവനന്തപുരം : സ്വകാര്യ ഹോട്ടലില്‍ സിവില്‍ പോലീസ് ഓഫിസറെ തൂങ്ങിമരിച്ച നിലയില്‍ കണ്ടെത്തി. നെയ്യാറ്റിന്‍കര സ്‌റ്റേഷനിലെ എസ്‌.ജെ സജിയാണ് മരിച്ചത്. ഇന്ന് പുലര്‍ച്ചെ തിരുവനന്തപുരം തമ്പാനൂരിലെ ഹോട്ടല്‍ മുറിയിലാണ് സജിയെ തൂങ്ങിമരിച്ച നിലയില്‍ കണ്ടെത്തിയത്. ഹോട്ടല്‍ ജീവനക്കാരാണ് സജിയുടെ മൃതദേഹം കണ്ടെത്തിയത്.
മേലുദ്യോഗസ്‌ഥരുടെ പീഡനമാണ് ആത്‍മഹത്യക്ക് കാരണമെന്നാണ് സജിയുടെ കുടുംബം ആരോപിക്കുന്നത്. സംഭവത്തില്‍ വിശദമായ അന്വേഷണം വേണമെന്നും കുടുംബാംഗങ്ങള്‍ ആവശ്യപ്പെട്ടു. ഇന്നലെ ഉച്ചയോടെയാണ് സജി തമ്പാനൂരിലെ സ്വകാര്യ ഹോട്ടലില്‍ മുറിയെടുത്തതെന്നാണ് വിവരം.
രണ്ട് ദിവസമായി സജിയെ കാണാനില്ലായിരുന്നു. ഇക്കാര്യം വ്യക്‌തമാക്കി സജിയുടെ കുടുംബം പോലീസില്‍ പരാതിയും നല്‍കിയിരുന്നു. തുടര്‍ന്ന് പോലീസ് കേസെടുത്ത് അന്വേഷണം നടത്തവയെയാണ് സജിയെ ഹോട്ടല്‍ മുറിയില്‍ മരിച്ച നിലയില്‍ കണ്ടെത്തിയത്. നെയ്യാറ്റിന്‍കര സ്‌റ്റേഷനിലെ സിഐ ഉള്‍പ്പടെയുള്ള മേലുദ്യോഗസ്‌ഥരുടെ പീഡനം മൂലമാണ് സജി ആത്‍മഹത്യ ചെയ്‌തതെന്നാണ്‌ കുടുംബം ആരോപിക്കുന്നത്.
