പത്തനംതിട്ട : ജില്ലാ ആസ്ഥാനത്തെ അബാൻ മേൽപ്പാല നിർമാണത്തിൽ മേൽപ്പാലത്തിന്റെ സ്ളാബുകൾ താങ്ങിനിർത്തിയ ഇരുമ്പുതൂണുകൾ വളഞ്ഞു. മൂന്നുദിവസം മുൻപ് മേൽപ്പാലത്തിന്റ ടോപ്പ് സ്ളാബ് വാർത്ത ഭാഗത്തെ താങ്ങിനിർത്തിയിരുന്ന തൂണുകൾ ഭാരം താങ്ങാനാകാതെ വളയുകയായിരുന്നു. നഗരസഭാ ഓപ്പൺ സ്റ്റേജ് നിന്നിരുന്നതിനടുത്തുള്ള മേൽപ്പാലത്തിന്റെ സ്ളാബാണ് വ്യാഴാഴ്ച വാർത്തത്. എന്നാൽ ഈ സ്ളാബിനെ താങ്ങിനിർത്തിയിരിക്കുന്ന തൂണുകൾ വളഞ്ഞുനിൽക്കുന്നത് കഴിഞ്ഞ ദിവസമാണ് ആളുകളുടെ ശ്രദ്ധയിൽപ്പെട്ടത്.
മൂന്ന് ഘട്ടമായി നടത്തുന്ന സ്ളാബ് കോൺക്രീറ്റിങ്ങിൽ ആദ്യഘട്ടം 25 ദിവസം മുൻപും രണ്ടാംഘട്ടം 20 ദിവസം മുൻപും പൂർത്തിയാക്കിയിരുന്നു. മൂന്നാംഘട്ടം കോൺക്രീറ്റുചെയ്തപ്പോൾ സ്ളാബിന്റെ ഒരുഭാഗത്ത് ഭാരം വർധിക്കുയും ഇരുത്തൽ ഉണ്ടാവുകയുംചെയ്തു. അതിനാലാണ് ഇരുമ്പുകമ്പികൾ വളഞ്ഞത്. ഈ ഭാഗത്ത് മേൽപ്പാലത്തിന്റെ പൊക്കവും കൂടുതലാണ്. എന്നാൽ ഇരുമ്പുതൂണുകൾക്കുണ്ടായ വളവ് മേൽപ്പാലത്തെ ബാധിച്ചിട്ടില്ലെന്നും ഇതുമൂലം പാലത്തിൽ വിള്ളലുകളോ പൊട്ടലുകളോ ഉണ്ടായിട്ടില്ലെന്നും അധികൃതർ പറഞ്ഞു. കെട്ടിടങ്ങളുടെ കോൺക്രീറ്റിങ്ങിനായുള്ള സാധാരണ കനംകുറഞ്ഞ ഇരുമ്പ് തൂണുകളാണ് ഇവിടെ ഉപയോഗിച്ചിരിക്കുന്നതെന്നും മേൽപ്പാലത്തിന്റെ ഭാരം താങ്ങാനുള്ള ശേഷി ഇവയ്ക്കില്ലെന്നുമുള്ള ആരോപണം നാട്ടുകാരിൽനിന്നു ഉയർന്നിട്ടുണ്ട്.
