കോഴിക്കോട് : താമരശ്ശേരി ചുരം എട്ടാം വളവിൽ നിയന്ത്രണം വിട്ട ലോറി ബൈക്ക് യാത്രക്കാരനെ ഇടിച്ചുതെറിപ്പിച്ചു. ഇന്ന് രാവിലെ ഏഴേകാലോടെയാണ് നാടിനെ ഞെട്ടിച്ച അപകടം ഉണ്ടായത്. ചുരം ഇറങ്ങി വരികയായിരുന്ന കർണാടക രജിസ്ട്രേഷനിലുള്ള ഒരു ചരക്ക് ലോറിയാണ് അപകടമുണ്ടാക്കിയത്. എട്ടാം വളവിൽ ചെറിയൊരു ഗതാഗത തടസ്സം ഉണ്ടായതിനെ തുടർന്ന് കാത്തുനിൽക്കുകയായിരുന്ന വാഹനങ്ങൾക്കിടയിലേക്കാണ് നിയന്ത്രണം നഷ്ടപ്പെട്ട ലോറി ഇടിച്ചുകയറിയത്. ലോറി ഇടിച്ച ആഘാതത്തിൽ ബൈക്ക് യാത്രക്കാരൻ റോഡിലേക്ക് തെറിച്ചുവീണു.
ബൈക്കിൽ ഇടിച്ച ശേഷം ലോറി തൊട്ടുമുന്നിലുണ്ടായിരുന്ന കാറിന്റെ പിൻഭാഗത്തും ഇടിച്ചു. വാഹനങ്ങളിൽ ഇടിച്ച ശേഷം ലോറി റോഡരികിലെ ഓടയിലേക്ക് മറിഞ്ഞു. പരിക്കേറ്റ ബൈക്ക് യാത്രക്കാരനെ ഉടൻ തന്നെ ആശുപത്രിയിലേക്ക് മാറ്റി. അപകടത്തെ തുടർന്ന് ചുരത്തിൽ വലിയ രീതിയിലുള്ള ഗതാഗത തടസ്സമുണ്ടായി. പോലീസ് സ്ഥലത്തെത്തിയാണ് ഗതാഗത ക്രമീകരണങ്ങൾ ഏർപ്പെടുത്തിയത്.
