കല്ലമ്പലം : ദേശീയപാതയില് കല്ലമ്പലം ജംഗ്ഷനില് കെ.എസ്.ആര്.ടി.സി.ബസ്സ് ടിപ്പറിലിടിച്ച് ബസ് യാത്രക്കാരായ 30 പേര്ക്ക് പരിക്കേറ്റു. ആലപ്പുഴയില് നിന്നും തിരുവനന്തപുരത്തേക്ക് പോവുകയായിരുന്ന ബസ് നഗരൂര് വെള്ളല്ലൂര് നിന്ന് മെറ്റില് കയറ്റി വരികയായിരുന്ന ടിപ്പറില് ഇടിക്കുകയായിരുന്നു.
ടിപ്പര് ജംഗ്ഷന് കടന്ന് കൊല്ലം ഭാഗത്തേക്ക് തിരിയുന്നതിനിടെ അമിത വേഗതയില് വന്ന ബസ് ഇടിക്കുകയായിരുന്നു. ഇടിയുടെ ആഘാതത്തില് മുഖവും തലയും കമ്പികളിലും സീറ്റുകളിലും ഇടിച്ചാണ് യാത്രക്കാര്ക്ക് പരിക്കേറ്റത്. അപകടത്തില് ബസിന്റെ വലതുവശം പൂര്ണ്ണമായി തകര്ന്നു. സീറ്റില് കുടുങ്ങിപ്പോയ ഡ്രൈവര് ആലപ്പുഴ മനു നിവാസില് മനോജിനെ നാട്ടുകാരും പോലീസും ചേര്ന്നു ഏറെ പണിപ്പെട്ടാണ് പുറത്തെടുത്തത്. കാലിന് സാരമായി പരിക്കേറ്റ മനോജിനെ പാരിപ്പള്ളി മെഡിക്കല് കോളേജില് പ്രവേശിപ്പിച്ചു.
ബസ് ടിപ്പറിലിടിച്ച ശേഷം ഇരുപതടിയോളം പിന്നോട്ട് നീങ്ങിയാണ് നിന്നത്. പരിക്കേറ്റവര് – കൊട്ടിയം സ്വദേശി ഫാത്തിമ (16), കൊല്ലം സ്വദേശികളായ അംജിത്ത് (44), ടിക്കു അരവിന്ദ് (44), ബഷീര് (56), ഓച്ചിറ സ്വദേശി വര്ഷ രാജന് (39), ചവറ സ്വദേശികളായ വിനോദ് (39), ഋഷിക (8), രേവതി (28) നജീബ് (46) , അനഘ ബാബു (20), പുലിയൂര്ക്കോണം സ്വദേശികളായ ആമിന (26), ബീന ബീഗം (58), ഹരിപ്പാട് സ്വദേശി പ്രദീപ് (21), ആലപ്പുഴ സ്വദേശികളായ ഗോപിക (23), പ്രകാശ് (28), നൂറനാട് സ്വദേശികളായ അജിത കുമാരി (49), ബിനു ( 41), കാരംകോട് സ്വദേശി ഷിബു സക്കറിയ ( 41), മാവേലിക്കര സ്വദേശി ഷൈന് (59),
കാര്യവട്ടം സ്വദേശി സതീഷ് കുമാര് (44), പുത്തന്പാലം സ്വദേശി അര്ച്ചന (34), ചാത്തന്നൂര് സ്വദേശികളായ ഗീതിക വിദ്യ കൃഷ്ണ (24), തിരുവനന്തപുരം നിത്യാനന്ദന് (69), കരുനാഗപ്പള്ളി സ്വദേശി അനീഷ് (23), കൊല്ലംകോട് സ്വദേശി സ്റ്റാലിന് (33), പാള്ട്ട് (45) എന്നിവര്ക്കാണ് പരിക്കേറ്റത്. ഇവരെ സ്വകാര്യ ആശുപത്രിയില് പ്രവശിപ്പിച്ചു. ആരുടെയും പരിക്ക് ഗുരുതരമല്ല. നാവായിക്കുളത്തു നിന്ന് ഫയര്ഫോഴ്സ് എത്തി ബസ്സും ലോറിയും മാറ്റി അര മണിക്കൂറിനുള്ളില് ഗതാഗതം പുന:സ്ഥാപിച്ചു. കല്ലമ്പലം പോലീസ് മേല്നടപടികള് സ്വീകരിച്ചു.
