തിരുവനന്തപുരം : നാലാം വിവാഹവാര്ഷിക ദിനത്തില് ഭര്ത്താവിനൊപ്പം ബൈക്കില് സഞ്ചരിക്കുന്നതിനിടെ കാറിടിച്ച് യുവതിക്ക് ദാരുണാന്ത്യം. മംഗലപുരം വാലികോണം ചീനിവിള തൊടിയില് വീട് കീര്ത്തന ഭവനില് അര്ച്ചനയാണ് (26) മരിച്ചത്. ബന്ധുവിന്റെ വിവാഹത്തില് പങ്കെടുക്കാനായി പൗഡിക്കോണം ചെല്ലമംഗലം ദേവീക്ഷേത്രത്തിലേക്ക് പോകുമ്പോള് ആണ് അര്ച്ചനയും ഭര്ത്താവ് രാഹുലും സഞ്ചരിച്ച ബൈക്കില് കാറിടിച്ച് അപകടമുണ്ടായത്.
ഇന്നലെ പത്തരയോടെയാണ് സംഭവം. അയിരൂപ്പാറ തേരുവിള ജംക്ഷനു സമീപം വെച്ചാണ് ദമ്പതികളുടെ ബൈക്കില് കാറിടിച്ചത്. റോഡിലേക്ക് തെറിച്ചുവീണ അര്ച്ചനയുടെ തലയ്ക്ക് ഗുരുതരമായി പരുക്കേറ്റു. ഭര്ത്താവ് രാഹുലിനും പരുക്കേറ്റു. ടെക്നോപാര്ക്കില് ഇന്ഫോസിസില് സെക്യൂരിറ്റി വിഭാഗം ഉദ്യോഗസ്ഥയുമാണ് അര്ച്ചന. ഒരു മകനുണ്ട്.
