പത്തനംതിട്ട : പമ്പയില് നിന്ന് നിലക്കലിലേക്ക് കുടിവെള്ളവുമായി പോയ ടാങ്കര് ലോറി മറിഞ്ഞു. നാലാം കലുങ്ക് ഭാഗത്ത് വച്ച് കൊക്കയിലേക്ക് മറിയുകയായിരുന്നു. സാരമായി പരുക്കേറ്റ ഡ്രൈവര് ആറ്റിങ്ങല് സ്വദേശി രാജേഷി (40)നെ ആശുപത്രിയില് പ്രവേശിപ്പിച്ചു. രാത്രി 10 ഓടെയാണ് അപകടം ഉണ്ടായത്. വാട്ടര് അതോറിറ്റിക്ക് വേണ്ടി കരാറടിസ്ഥാനത്തില് ഓടുന്ന ലോറി അമ്പതടിയോളം താഴ്ചയിലേക്ക് മറിയുകയായിരുന്നു. അഗ്നിരക്ഷാ സേനയും പോലീസും ചേര്ന്ന് ഏറെ പ്രയാസപ്പെട്ടാണ് രാജേഷിനെ പുറത്തെടുത്തത്. പമ്പ ഗവണ്മെന്റ് ആശുപത്രിയിലെ പ്രഥമ ശുശ്രൂഷക്കു ശേഷം ഇയാളെ പത്തനംതിട്ട ജനറല് ആശുപത്രിയിലേക്കു മാറ്റി.
