പാലക്കാട്: അട്ടപ്പാടിയില് ആദിവാസി സ്ത്രീയെ കൊലപ്പെടുത്തിയ പ്രതി പിടിയില്. അട്ടപ്പാടി ചാവടിയൂരില് ആദിവാസി വീട്ടമ്മ ചെമ്മണ്ണൂര് സ്വദേശിനി ലക്ഷ്മി (42) കൊല്ലപ്പെട്ട സംഭവത്തിലാണ് ഇവര്ക്കൊപ്പം താമസിച്ചിരുന്നയാളെ പോലീസ് അറസ്റ്റ് ചെയ്തത്. കള്ളമല സ്വദേശി സലിന് ജോസഫാണ് (51) അറസ്റ്റിലായത്. ലക്ഷ്മിയെ വെട്ടിയും കല്ലുകൊണ്ട് തലയ്ക്കടിച്ചും കൊലപ്പെടുത്തുകായിരുന്നുവെന്ന് പോലീസ് പറയുന്നു. ചൊവ്വാഴ്ച രാത്രി ഒന്പത് മണിയോടെയായിരുന്നു.
സലിന് ഭാര്യയും അഞ്ച് മക്കളും ലക്ഷ്മിക്ക് ഭര്ത്താവും മൂന്ന് മക്കളുമുണ്ട്. എട്ട് വര്ഷമായി ഇരുവരും ഒരുമിച്ചു കഴിയുകയാണ്. ഒരു മാസം മുന്പാണ് ചാവടിയൂരിലെ ലക്ഷ്മിയുടെ ബന്ധുവീട്ടില് താമസമാക്കിയത്. ഇരുവരും മദ്യപിക്കുമായിരുന്നുവെന്ന് പോലീസ് പറയുന്നു. പതിവായി വഴക്കിടാറുണ്ടെന്ന് അയല്വാസികള് പോലീസിനോട് പറഞ്ഞു. സംഭവദിവസം വൈകിട്ട് ഇവര് തമ്മില് തര്ക്കമുണ്ടായിരുന്നു.
രാത്രി ഒന്പതുമണിയോടെ ഊരുമൂപ്പനോട് ലക്ഷ്മിയെ താന് വെട്ടിയെന്ന് സലിന് പറയുകയായിരുന്നു. ഇതിനുശേഷം അര്ധരാത്രിയോടെ സലിനെ പോലീസ് കസ്റ്റഡിയിലെടുത്തു. കല്ലുകൊണ്ട് തലയ്ക്കടിച്ചതിനാലാണ് മരണം സംഭവിച്ചതെന്ന് പോലീസ് പറഞ്ഞു. എ.എസ്.പി. പദംസിങ്, ക്രൈം ഡിറ്റാച്ച്മെന്റ് ഡിവൈ.എസ്.പി. സുന്ദരന്, എസ്.ഐമാരായ രതീഷ്, ജയപ്രസാദ്, എസ്.സി.പി.ഒ.മാരായ സുന്ദരി, ദേവസ്യ, രജീഷ് എന്നിവരുടെ നേതൃത്വത്തില് ഇന്ക്വസ്റ്റ് നടപടികള് പൂര്ത്തിയാക്കി. ഫോറന്സിക് വിദഗ്ധര് സ്ഥലത്തെത്തി തെളിവുശേഖരിച്ചു.
