കോഴിക്കോട്: ബിസിനസിൽ ഇരട്ടി ലാഭം വാഗ്ദാനം ചെയ്ത് 35 ലക്ഷം രൂപ തട്ടിയെടുത്ത കേസിൽ മൂന്നുപേരെ പോലീസ് അറസ്റ്റ് ചെയ്തു. കഴിഞ്ഞ വർഷം നടന്ന സംഭവത്തിൽ പോലീസ് ഉദ്യോഗസ്ഥരെന്ന് നടിച്ച് പണം കൈക്കലാക്കിയ സംഘത്തെയാണ് പന്തീരാങ്കാവ് പോലീസും ഫറോക്ക് എ.സി.പി സ്ക്വാഡും ചേർന്ന് പിടികൂടിയത്. കടലുണ്ടി സ്വദേശിയായ തൊണ്ടിക്കോടൻ വസീം എന്നയാളാണ് ഈ തട്ടിപ്പിന്റെ പ്രധാന ആസൂത്രകൻ. ബിസിനസ്സിൽ പണം നിക്ഷേപിച്ചാൽ ഇരട്ടി ലാഭം ലഭിക്കുമെന്ന് വിശ്വസിപ്പിച്ച് വസീം പരാതിക്കാരനെ സമീപിച്ചു. ഈ വാഗ്ദാനത്തിൽ വീണ് 35 ലക്ഷം രൂപയുമായി പരാതിക്കാരൻ എത്തി. പണം കൈമാറുന്ന സമയത്ത് വസീമിന്റെ സുഹൃത്തുക്കളായ പുത്തൂർമഠം സ്വദേശി ഷംസുദ്ദീൻ, കുറ്റിക്കാട്ടൂർ സ്വദേശി മുഹമ്മദ് റാഫി എന്നിവർ പോലീസ് ഉദ്യോഗസ്ഥരെന്ന വ്യാജേന സ്ഥലത്തെത്തി.
പണത്തിന്റെ ഉറവിടം അന്വേഷിക്കുകയാണെന്ന് പറഞ്ഞ് ഇവർ പരാതിക്കാരനെ ഭീഷണിപ്പെടുത്തുകയും, പണവും ഇയാളെയും കസ്റ്റഡിയിലെടുത്ത് കൊണ്ടുപോവുകയാണെന്ന് വരുത്തിത്തീർക്കുകയും ചെയ്തു. പോലീസ് ആണെന്ന് വിശ്വസിപ്പിച്ച് പണം കൈക്കലാക്കിയ ശേഷം, ഇത് തട്ടിപ്പാണെന്ന് പരാതിക്കാരന് പിന്നീട് മനസ്സിലായി. തുടർന്ന് ഇയാൾ പോലീസിൽ പരാതി നൽകുകയായിരുന്നു. വിശദമായ അന്വേഷണത്തിനൊടുവിലാണ് പ്രതികളെ പോലീസ് പിടികൂടിയത്.
