തിരുവനന്തപുരം: ഉത്സവ സീസണില് യാത്രക്കാരില് നിന്ന് അമിത നിരക്ക് ഈടാക്കുന്ന അന്തര്സംസ്ഥാന ബസ്സുകള്ക്കെതിരെ കര്ശന നടപടി സ്വീകരിക്കുവാന് ഗതാഗത മന്ത്രി ആന്റണി രാജു. മന്ത്രിയുടെ അധ്യക്ഷതയില് ചേര്ന്ന ഉന്നതതല യോഗത്തിലാണ് ഇക്കാര്യം തീരുമാനിച്ചത്. ഈസ്റ്റര്, വിഷു, റംസാന് പ്രമാണിച്ച് സംസ്ഥാനാന്തര യാത്രകളില് ഭീമമായ നിരക്ക് ഈടാക്കി യാത്രക്കാരെ ചൂഷണം ചെയ്യുന്നതിനെതിരെ നിരവധി പരാതികള് ലഭിച്ചിരുന്നു. ഇതിനെ തുടര്ന്നാണ് അടിയന്തര യോഗം ചേര്ന്നത്.
നിയമം ലംഘിച്ച് ഓടിക്കുന്ന വാഹനങ്ങള് പിടിച്ചെടുക്കുന്നത് മൂലം യാത്രക്കാര്ക്ക് ഉണ്ടാകുന്ന ബുദ്ധിമുട്ടുകള് പരിഹരിക്കേണ്ട പൂര്ണ ഉത്തരവാദിത്വം ബസ് ഉടമകള്ക്കായിരിക്കും. ഉത്സവ സീസണിലെ വാഹന പരിശോധനയ്ക്കായി സ്ക്വാഡ് രൂപീകരണത്തിനായി ട്രാന്സ്പോര്ട്ട് കമ്മീഷണറുടെ നേതൃത്വത്തില് ഏപ്രില് 1-ന് പ്രത്യേക യോഗം ചേരും. കോണ്ട്രാക്ട് കാരിയേജ് വാഹനങ്ങളില് സ്പീഡ് ഗവര്ണറിലും ജിപിഎസ്സിലും കൃത്രിമം കാണിച്ച് അനുവദനീയമായതിലും അധികം സ്പീഡില് ഓടിക്കുന്ന വാഹനങ്ങള്ക്കെതിരെ കര്ശന നടപടി സ്വീകരിക്കുവാന് മോട്ടോര് വാഹന വകുപ്പിന് മന്ത്രി നിര്ദേശം നല്കി.
