കുന്നംകുളം : യാത്രക്കാരെ വഴിയിലിറക്കി ബസ് സ്റ്റാന്‍ഡില്‍ കയറാത്ത ദീര്‍ഘദൂര സ്വകാര്യ ബസുകള്‍ക്കെതിരെ നടപടി തുടങ്ങി. മുന്നറിയിപ്പ് ലംഘിച്ച്‌ വീണ്ടും ബസുകള്‍ സ്റ്റാന്‍ഡില്‍ കയറാതെ യാത്രക്കാരെ വഴിയിലിറക്കിവിടുന്നത് തുടര്‍ന്നതോടെയാണ് നടപടി തുടങ്ങിയത്. സ്റ്റാന്‍ഡില്‍ കയറാതെ അശ്രദ്ധമായും വണ്‍വേ തെറ്റിച്ചും സര്‍വിസ് നടത്തിയ ഗുരുവായൂര്‍ – പാലക്കാട് റൂട്ടിലോടുന്ന ദര്‍ഷന്‍ ബസ് കുന്നംകുളം സി.ഐ വി.സി സൂരജ് പിടിച്ചെടുത്തു. ബസ് സ്റ്റാന്‍ഡില്‍ പ്രവേശിക്കാതെ യാത്രക്കാരെ റോഡരികില്‍ ഇറക്കിവിടുകയായിരുന്നു. യാത്രക്കാരുടെ പരാതിയെ തുടര്‍ന്നാണ് നടപടി.
സംഭവത്തില്‍ ബസ് ഡ്രൈവര്‍ തിരുവില്വാമല കുത്താമ്പുള്ളി വീട്ടില്‍ വൈശാഖ് (36), കണ്ടക്ടര്‍ ഒറ്റപ്പാലം അമ്പലപ്പാറ രാജ്ഭവന്‍ വീട്ടില്‍ ബാബുരാജ് (35) എന്നിവരാണ് അറസ്റ്റിലായത്. ബസിന്റെ പെര്‍മിറ്റ് റദ്ദാക്കാനും അശ്രദ്ധമായി വാഹനമോടിച്ച ഡ്രൈവറുടെ ലൈസന്‍സ് സസ്‌പെന്‍ഡ് ചെയ്യാനും നടപടി ആരംഭിച്ചു. സ്റ്റാന്‍ഡില്‍ കയറാതെ സര്‍വിസ് നടത്തുന്ന ദീര്‍ഘദൂര ബസുകളുടെ പെര്‍മിറ്റ് റദ്ദാക്കുമെന്ന് പോലീസ് മുന്നറിയിപ്പ് നല്‍കി. ഡ്രൈവറുടെയും കണ്ടക്ടറുടെയും ലൈസന്‍സും റദ്ദാക്കും. സ്റ്റാന്‍ഡില്‍ കയറാതെ സര്‍വിസ് നടത്തുന്ന ബസുകള്‍ക്കെതിരെ തുടര്‍ദിവസങ്ങളില്‍ കര്‍ശന നടപടി സ്വീകരിക്കുമെന്നും സി.ഐ വ്യക്തമാക്കി.
