മുംബൈ: ചികിത്സയിലായിരുന്ന മുതിർന്ന ബോളിവുഡ് നടൻ ധർമേന്ദ്ര ആശുപത്രി വിട്ടു. ഇന്ന് പുലർച്ചയോടെയാണ് മുംബൈയിലെ ബ്രീച്ച് കാൻഡി ആശുപത്രിയിൽ നിന്ന് 89 കാരനായ നടൻ മടങ്ങിയത്. ശ്വാസതടസം അനുഭവപ്പെട്ടതിനെ തുടർന്ന് ഒക്ടോബർ 31നായിരുന്നു നടനെ ആശുപത്രിയിൽ പ്രവേശിപ്പിച്ചത്. എന്നാൽ പതിവ് പരിശോധനയ്ക്കു വേണ്ടിയാണ് ആശുപത്രിയിലേക്ക് കൊണ്ടുപോയതെന്ന് ധർമ്മേന്ദ്രയുടെ സംഘം പിന്നീട് സ്ഥിരീകരിച്ചിരുന്നു. രാവിലെ 7.30 ഓടെ ധർമ്മേന്ദ്രയെ ഡിസ്ചാർജ് ചെയ്തതായി ആശുപത്രിയിലെ ഡോക്ടർ പ്രതിത് സംദാനി പറഞ്ഞു.
വീട്ടിൽ ചികിത്സ നൽകാൻ കുടുംബം തീരുമാനിച്ചുവെന്നും ഡോക്ടർ പറഞ്ഞു. നേരത്തെ ധർമേന്ദ്ര അന്തരിച്ചുവെന്ന തരത്തിൽ വ്യാജ വാർത്തകൾ സമൂഹമാധ്യമങ്ങളില് അടക്കം പ്രചരിച്ചിരുന്നു. ഇതിനെതിരെ നടന്റെ കുടുംബം രംഗത്തെത്തിയിരുന്നു. മാധ്യമങ്ങൾ തിടുക്കം കാട്ടി തെറ്റായ വർത്തകൾ പ്രചരിപ്പിക്കുകയാണെന്ന് മകൾ ഇഷ ഡിയോൾ ഇൻസ്റ്റഗ്രാമിലൂടെ പ്രതികരിച്ചിരുന്നു.
