തിരുവനന്തപുരം : കേരള സംസ്ഥാന ചലച്ചിത്ര അക്കാദമി ചെയർമാൻ സ്ഥാനത്തേക്ക് തന്റെ പേര് പരിഗണിച്ചത് വലിയൊരു ബഹുമതിയായി കാണുന്നുവെന്നും എന്നാൽ വിനയപൂർവ്വം ആ പദവി നിരസിക്കുകയാണെന്നും നടൻ ജഗദീഷ്. തന്റെ ഈ നിലപാട് ബന്ധപ്പെട്ട കേന്ദ്രങ്ങളെ അറിയിച്ചിട്ടുണ്ടെന്നും അദ്ദേഹം പറഞ്ഞു. നിലവിൽ സിനിമയിലെ നല്ല വേഷങ്ങൾ ചെയ്യുന്നതിനാണ് താൻ മുൻഗണന നൽകുന്നതെന്നും, അതിനാലുള്ള സമയക്കുറവ് കാരണം ഇത്തരമൊരു ഉത്തരവാദിത്തപ്പെട്ട പദവി ഏറ്റെടുക്കാൻ പ്രായോഗികമായ ബുദ്ധിമുട്ടുകൾ ഉണ്ടെന്നുമാണ് ജഗദീഷ് പറഞ്ഞത്.
ഇത്രയും വലിയൊരു സ്ഥാനത്തിരിക്കുന്ന വ്യക്തി തന്റെ സമയത്തിന്റെ ഭൂരിഭാഗവും അതിനുവേണ്ടി മാറ്റിവെക്കാൻ കഴിയുന്ന ഒരാളായിരിക്കണം എന്നാണ് തന്റെ കാഴ്ചപ്പാടെന്നും, നിലവിലെ സാഹചര്യത്തിൽ തനിക്ക് അതിന് സാധിക്കില്ലെന്നും അദ്ദേഹം അറിയിച്ചു. തന്റെ പേര് ഈ സ്ഥാനത്തേക്ക് പരിഗണിച്ചതിൽ സന്തോഷം ഉണ്ടെന്നും അദ്ദേഹം പറഞ്ഞു.
