ചെന്നൈ: നടനും സംവിധായകനുമായ മനോബാല അന്തരിച്ചു. അദ്ദേഹത്തിന് 69 വയസ്സായിരുന്നു. ഹൃദ്രോഗത്തെ തുടര്ന്ന് ചികിത്സയിലായിരുന്നു. ബുധനാഴ്ച രാവിലെ സ്വവസതിയില് വെച്ചായിരുന്നു അന്ത്യം. അടുത്തിടെ ഹൃദ്രോഗത്തിന് ആന്ജിയോ ഗ്രാം ചികിത്സ നടത്തി ആരോഗ്യനില വീണ്ടെടുത്തിരുന്നു. പിന്നീട് വീണ്ടും രോഗം വഷളാവുകയായിരുന്നു.
തമിഴിലും മലയാളത്തിലുമായി നിരവധി ചിത്രങ്ങളില് അഭിനയിച്ചിട്ടുണ്ട്. ഹാസ്യ കഥാപാത്രങ്ങളാണ് കൈകാര്യം ചെയ്തിരുന്നത്. എഴുനൂറോളം ചിത്രങ്ങളില് അദ്ദേഹം അഭിനയിച്ചിട്ടുണ്ട്. 40 ചിത്രങ്ങളാണ് അദ്ദേഹം സംവിധാനം ചെയ്തിരിക്കുന്നത്. 1970-കളുടെ അവസാനത്തില് ഭാരതിരാജയുടെ സഹസംവിധായകനായി തന്റെ കരിയര് ആരംഭിച്ച മനോബാല 1982-ല് അഗയ ഗംഗൈ എന്ന ചിത്രത്തിലൂടെ സംവിധായകനായി അരങ്ങേറ്റം കുറിച്ചു. പിള്ള നില, ഊര്ക്കാവലന്, മല്ലു വെട്ടി മൈനര് തുടങ്ങി നിരവധി ഹിറ്റ് ചിത്രങ്ങള് അദ്ദേഹം സംവിധാനം ചെയ്തു. ജനുവരി 14 ന് പുറത്തിറങ്ങിയ ചിരഞ്ജീവിയും രവി തേജയും അഭിനയിച്ച ബ്ലോക്ക്ബസ്റ്റര് ചിത്രമായ വാള്ട്ടയര് വീരയ്യയിലാണ് അദ്ദേഹം അവസാനമായി അഭിനയിച്ചത്.
