പത്തനംതിട്ട : നടൻ സന്തോഷ് കെ. നായർ അന്തരിച്ചു. മലയാള സിനിമ-സീരിയൽ രംഗത്തെ പ്രമുഖ നടന്മാരിൽ ഒരാളായിരുന്നു ഇദ്ദേഹം. ഇന്ന് പുലർച്ചെ പത്തനംതിട്ട ഏനാത്ത് വെച്ചുണ്ടായ വാഹനാപകടത്തിലാണ് മരണം സംഭവിച്ചത്. കാറും വാനും കൂട്ടിയിടിച്ചാണ് അപകടം ഉണ്ടായത്.
തിരുവനന്തപുരം സ്വദേശിയായ സന്തോഷ് കെ. നായരും ഭാര്യയും സഞ്ചരിച്ചിരുന്ന കാർ എതിർദിശയിൽ വന്ന വാനിലേക്ക് ഇടിച്ചു കയറുകയായിരുന്നു. പുലർച്ചെ നടന്ന അപകടമായതിനാൽ ഡ്രൈവർ ഉറങ്ങിപ്പോയതാകാം അപകടകാരണമെന്നാണ് പ്രാഥമിക നിഗമനം. കാറിന്റെ മുൻഭാഗം അപകടത്തിൽ പൂർണ്ണമായും തകർന്നു.
അപകടത്തിൽ ഗുരുതരമായി പരിക്കേറ്റ സന്തോഷിനെയും ഭാര്യയെയും ഉടൻ തന്നെ അടൂരിലെ ഒരു സ്വകാര്യ ആശുപത്രിയിൽ എത്തിച്ചെങ്കിലും അവിടെ വെച്ചുണ്ടായ ഹൃദയാഘാതത്തെ തുടർന്ന് അദ്ദേഹം മരണപ്പെടുകയായിരുന്നു. അപകടത്തിൽ പരിക്കേറ്റ അദ്ദേഹത്തിന്റെ ഭാര്യ ചികിത്സയിലാണ്.
