ചെന്നൈ : ഭര്‍ത്താവിന്റെ ഓര്‍മകളെ കുറിച്ച് ഇന്‍സ്റ്റഗ്രാമിലൂടെ കുറിപ്പ് പങ്കുവെച്ച് നടി മീന. കഴിഞ്ഞ മാസം 28നാണ് നടി മീനയുടെ ഭര്‍ത്താവ് വിദ്യാസാഗര്‍ അന്തരിച്ചത്. ശ്വാസകോശ സംബന്ധമായ അസുഖത്തെ തുടര്‍ന്നായിരുന്നു അന്ത്യം. കൊവിഡാനന്തര ആരോഗ്യപ്രശ്‌നങ്ങളെ തുടര്‍ന്ന്ചികിത്സയിലായിരുന്നു. കുറച്ചു വര്‍ഷങ്ങളായി ശ്വാസ കോശ രോഗങ്ങള്‍ക്ക് ചികിത്സയില്‍ ആയിരുന്നു. കഴിഞ്ഞ ജനുവരിയില്‍ കോവിഡ് ബാധിച്ചതിനെ തുടര്‍ന്ന് രോഗം ഗുരുതരമായി. അണുബാധ രൂക്ഷമായതിനെത്തുടര്‍ന്ന് ശ്വാസകോശം മാറ്റിവെയ്ക്കണമെന്ന് ഡോക്ടര്‍മാര്‍ നിര്‍ദേശിച്ചെങ്കിലും അവയവദാതാവിനെ കിട്ടാന്‍ വൈകി.. 2009 ലാണ് മീനയും വിദ്യാസാഗറും വിവാഹിതരായത്.
മീനയുടെ ഇന്‍സ്റ്റഗ്രാം കുറിപ്പ്
‘ഞങ്ങള്‍ക്ക് കിട്ടിയ മനോഹരമായ അനുഗ്രഹമായിരുന്നു നിങ്ങള്‍. പക്ഷേ വളരെ പെട്ടെന്ന് ഞങ്ങളില്‍ നിന്ന് അകന്നുപോയി. ഞങ്ങളുടെ (എന്റെ) ഹൃദയങ്ങളില്‍ എന്നും ഉണ്ടാകും. സ്‌നേഹവും പ്രാര്‍ത്ഥനയും അറിച്ചതിന് ലോകമെമ്പാടുമുള്ള ദശലക്ഷക്കണക്കിന് നല്ല ഹൃദയങ്ങള്‍ക്ക് ഞാനും കുടുംബവും നന്ദി പറയുന്നു. തീര്‍ച്ചയായും ഞങ്ങള്‍ക്ക് നിങ്ങളുടെ പിന്തുണ വേണം. സ്‌നേഹവും കരുതലും പിന്തുണയും നല്‍കുന്ന സുഹൃത്തുക്കളും കുടുംബാംഗങ്ങളും ഉള്ളതിനാല്‍ ഞങ്ങള്‍ വളരെ കൃതാര്‍ത്ഥരാണ്.’-
